०७ असार २०८३, आइतबार
लुम्बिनी प्रदेशका दुई ठूला भन्सार कार्यालयले लक्ष्यभन्दा निकै कम राजस्व संकलन गरेका छन् । भैरहवा र नेपालगञ्ज भन्सार कार्यालय राजस्व संकलनमा लक्ष्यको छेउछाउसमेत पुग्न नसकेका हुन् ।
यी दुवै भन्सार कार्यालय गत आर्थिक वर्ष २०८०–८१ मा लक्ष्य अनुसारको राजस्व संकलन गर्न असफल भए । रुपन्देहीको भैरहवा भन्सार कार्यालयबाट लक्ष्यको ६३.२४ प्रतिशत र बाँकेको नेपालगञ्जबाट लक्ष्यको ६३.३४ प्रतिशत मात्र राजस्व संकलन भएको छ ।
भैरहवा भन्सारले आव ०८०–८१ मा १ खर्ब २७ अर्ब ८३ करोड ६६ लाख रुपैयाँ राजस्व संकलन गर्ने लक्ष्य राखेकोमा ६३.२४ प्रतिशत मात्रै संकलन भएको कार्यालयका प्रमुख भन्सार अधिकृत नारद गौतमले जानकारी दिए ।
उनका अनुसार एक वर्षमा ८० अर्ब ८३ करोड रुपैयाँ राजस्व संकलन भएको छ । आयात परिमाणका दृष्टिले भैरहवा मुलुकको दोस्रो ठूलो भन्सार नाका हो ।
कार्यालयले अघिल्लो आव २०७९–८० मा १ खर्ब ५५ अर्ब ६० करोड रुपैयाँको लक्ष्य राखेकोमा ७६ अर्ब ८८ करोड (४९.४१ प्रतिशत) मात्र राजस्व संकलन गरेको थियो ।
यस्तै आव २०७८–७९ मा १ खर्ब २७ अर्ब राजस्व उठाउने लक्ष्य थियो । जसमा १ खर्ब १५ अर्ब रुपैयाँ संकलन भएको थियो । कोरोना भाइरस महामारीका बीचमा पनि आव २०७७–७८ मा लक्ष्यभन्दा १३ प्रतिशत बढी राजस्व संकलन थियो ।
नेपालगञ्ज भन्सार कार्यालयले गत आव ०८०–८१ मा लक्ष्यको ६३ दशमलव ३४ प्रतिशत राजस्व संकलन गर्न सफल भएको छ । २८ अर्ब ६६ करोड रुपैयाँ राजस्व संकलनको लक्ष्य रहेकामा १८ अर्ब १५ करोड मात्रै राजस्व संकलन भएको भन्सार कार्यालयका प्रमुख भन्सार अधिकृत ध्रुवराज विश्वकर्माले जानकारी दिए ।
नेपालगञ्ज भन्सार कार्यालयले पनि गत आवका कुनै पनि महिनामा लक्ष्य पूरा गर्न सकेन । नेपालगञ्ज नाका हुँदै भारतबाट पेट्रोलियम पदार्थ, मार्बल, खाद्यान्न, तरकारी, फलफूल आयात हुन्छ । यस्तै नेपालगञ्जबाट जडीबुटी, एसेन्सियल आयल, दालचिनी, अलैँची, प्लाइउड, खोटो रोजिन लगायतका अन्य वस्तु भारततर्फ निकासी हुने गरेको छ ।
आर्थिक मन्दीले कम आयात हुनु र सरकारका अन्य नीतिगत समस्याका कारण गत आवमा राजस्व असुली खुम्चिन पुगेको भैरहवा भन्सारले जनाएको छ ।
कार्यालयका प्रमुख गौतमले बेलहिया नाका हुँदै हुने आयात खुम्चिँदा लक्ष्य भेट्टाउन नसकिएको बताए । बढी भन्सार राजस्व दिने वस्तुकै आयात घटेको र अघिल्लो आवमा भएको असुलीको तुलनामा राजस्व संकलन केही बढेको उनले बताए । बेलहिया नाकाबाट सबैभन्दा बढी आयात हुने जीप, कार, भ्यान, मोटरसाइकल, डिजेल, पेट्रोल, फलामे ब्लेड, मार्बल, खाद्यान्न र अन्य व्यापारिक वस्तुको आयात घट्दा राजस्व संकलनमा प्रभाव परेको उनको भनाइ छ । साना सवारीसाधन, फलामे एमएस ब्लेड र पेट्रोलियम पदार्थको आयातबाट भैरहवा भन्सारको कुल राजस्व संकलनमा झण्डै २५ प्रतिशत योगदान रहने गरेको बताइन्छ ।
भैरहवा भन्सारबाट हुने निर्यात भने बढेको छ । अघिल्लो आव ०७९–८० को तुलनामा आव ०८०–८१ मा निर्यात बढेको छ ।
अघिल्लो आवमा १० अर्ब ९६ करोड रुपैयाँ बराबरका विभिन्न नेपाली वस्तु विदेश निकासी भएकोमा आव ०८०–८१ को जेठ मसान्तसम्ममा १३ अर्ब १७ करोड रुपैयाँ बराबरको निकासी भएको छ ।
भैरहवा भन्सारबाट सेन्थेटिक यार्न, सिमेन्ट, सिमेन्ट क्लिङ्कर, अल्किड रेजिन र अन्य पिभिसी रेजिन, खोटो रोजिन, चाउचाउ, अन्य नुडल्स, पास्ता, प्लाइउड, जडीबुटी, पिना र अन्य वनस्पतिजन्य उत्पादन निर्यात हुने गर्दछन् ।
