भक्तपुरको होटलमा घिनलाग्दो यौनधन्दा, बन्धक बनाएर नाबालिकदेखि किशोरीसम्मको शोषण [भिडियोसहित]

आवरणमा ढिँडो सर्भिस, कोठाभित्र अर्कै धन्दा, अर्थात् यौन व्यवसाय । गर्भनिरोधक चक्कीको चाङ, प्रेगनेन्सी टेस्ट किट तथा अस्थायी साधनहरूसमेत होटलमै राखेर यौनजन्य धन्दा चलाएको पाइएको छ, त्यो पनि नाबालिक तथा किशोरीलाई बन्धक बनाएर ।

भक्तपुरको मध्यपुर थिमि नगरपालिका– १ मनोहरा जडिबुटीमा रहेको सिन्धुली होटल ढिँडो सर्भिस एन्ड गेस्ट हाउसमा यस्तै धन्दा चलेको पाइएको हो । 

आर्थिक अवस्था कमजोर भएका र जागिरको खोजीमा रहेका किशोरी तथा बालिकालाई उक्त होटलमा वेटरमा काम लगाइदिने प्रलोभनमा पारी जबरजस्ती यौनजन्य कार्यमा लगाउने गरेको पाइएको हो । उनीहरूले भनेबमोजिम नगरे शारीरिक तथा मानसिक यातना दिने गरिन्थ्यो ।  

यस्तै परिबन्धमा पारियो ललितपुरकी कृपा (नाम परिवर्तन)लाई । कृपाको आमाले दोस्रो विवाह गरेका कारण उनको विद्यालय परिवर्तन भयो । तर, पारिवारिक कुरालाई लिएर विद्यालयमा साथीभाइले गिज्याउने र हेँला गर्ने भएकाले उनी विद्यालय जान छाडिन् । 

कृपाको चिनजानकी साथी संगीताले एक क्लबमा काम गर्ने अवसर छ भनेर आफू बसिरहेको होटल अर्थात् सिन्धुली होटल ढिँडो सर्भिस एन्ड गेस्टहाउसमा बोलाइन् । उनीहरूले त्यहाँ गएर जागिरका लागि कुरा गरे ।

त्यसबेला कृपा एक साताभन्दा बढी समय सोही होटलमा साथीसँग बसिन् । त्यतिबेला होटलका सञ्चालकहरूसँग कृपालाई उनको साथीले चिनाएकी थिइन् ।

कृपा घर फर्केपछि उनको फेसबूकमा ती सञ्चालकको फ्रेन्ड रिक्वेस्ट आयो । चिनजान भयो भन्ने हिसाबले कृपाले रिक्वेस्ट एसेप्ट गरिन् ।

सूर्य तामाङ नामको आईडीबाट होटल सञ्चालक कुशल खरेलले उक्त होटलमा पैसा तिर्न बाँकी रहेको र आएर पैसा तिर्न आग्रह गरे । पैसा तिर्न नआएमा पैसा नतिरी भागेको भनेर आमाबुवालाई भनिदिने र बेइज्जत गरिदिने धम्कीसमेत दिन्छन् । 

त्यही डरले साथीकोमा जाने बहाना गरेर गत जेठ १५ गते कृपा दोस्रोपटक उक्त होटल पुग्छिन् । खरेलले ७ हजार रुपैयाँ तिर्न बाँकी रहेको हिसाब दिन्छन् ।

आफूसँग त्यति पैसा नभएकाले घरबाट पैसा ल्याएर दिने कृपाले बताउँछिन् । तर उनीहरूले चारैतिर सीसी क्यामेराजडित उक्त होटलमै बन्धक बनाउँछन् । कृपाको मोबाइलसमेत खोसेर परिवारसँग सम्पर्क टुटाइदिन्छन् र कोठामा लगेर थुनिदिन्छन् । 

कोठा नम्बर २ मा बन्द बनाइएकी कृपाको कोठामा अपरिचित व्यक्ति पुग्छन् । होटलका साहुलाई पैसा तिरेर आएको बताउँदै ती ग्राहकले कृपामाथि जबरजस्ती गर्छन् ।

कृपा रुन्छिन्, चिच्याउँछिन्, तर गुहार पाउँदिनन् । किनकि उनको चित्कार बाहिर सुनिन्छ भनेर चर्को आवाजमा स्पिकर बजाइएको हुन्छ । 

बन्द कोठामा कृपाले कहिल्यै नसोचेको असह्य पीडा खेप्नुपर्यो । आफूमाथि होटल सञ्चालकले समेत बलात्कार गरेको उनले प्रहरीसँग बताएकी छन् ।

एकदिनमा ७ जना ग्राहकसँग बस्न लगाउने गरेको बयान पीडितले दिएकी छन् । यसरी बस्न ड्राइभरदेखि प्रहरीका जागिरेहरू समेत आउने गरेको उनको भनाइ छ । 

पीडित कृपाका अनुसार उक्त होटलमा नाबालिकादेखि २१ वर्षसम्मका किशोरी गरी ११ जना बन्धक थिए । तीमध्ये कति भाग्न सफल भए, भाग्न नपाएकाहरू त्यहीँ थुनिएर बस्न बाध्य भए । कतिपय भने आफूखुशी बसेको कृपाको भनाइ छ । प्रहरीले तीन जनालाई उद्धार गरी सेफ हाउसमा राखेको छ । 

नेपाल प्रहरीको मानव बेचबिखन अनुसन्धान ब्यूरोको विशेष अपरेसनबाट धन्दामा संलग्न तीनजना पक्राउ परिसकेका छन् भने एकजना अझै फरार छ । 

ब्यूरोको पहिलो अपरेसनमा गत असार २४ गते होटलबाटै दुई जनालाई पक्राउ गरिएको थियो । सिन्धुली हरिहरपुर गाउँपालिका– १ का ३३ वर्षीय वीरबहादुर सिंतान र उनका भाइ २५ वर्षीय सुविलाल सिंतान पक्राउ परेका थिए ।

अर्का सञ्चालक कुशल खरेललाई साउन ८ मा काठमाडौंको बत्तीसपुतलीबाट पक्राउ गरिएको थियो । खरेल उक्त होटलका एकल सञ्चालक थिए ।

पछि सिंतानलगायतलाई पाटर्नर बनाएका हुन् । त्यसपछि भने कुशलले होटलमै बसेर ग्राहक ल्याएबापत कमिसन खाने गरेको प्रहरीको भनाइ छ । 

काभ्रेको चौँरीदेउराली गाउँपालिका– १ का २० वर्षीय कुशल खरेल युट्युबर हुन् । खरेलले होटलमा बन्धक बनाएर यौनधन्दामा लगाएका पीडितहरूलाई उनीहरूको भिडियो युट्युबमा राखेर भाइरल गराइदिने धम्की दिने गरेकोसमेत खुलेको छ । 

ती पीडितहरूलाई पटक–पटक सञ्चालकले समेत यौनशोषण गरेको प्रहरीले जनाएको छ । पीडितलाई मादक पदार्थ सेवन गराउने र प्रतिव्यक्ति पन्ध्र सयदेखि पाँच हजारसम्म लिएर ग्राहकसँग शारीरिक सम्पर्क गराउने गरेको प्रहरी अनुसन्धानले देखाएको छ । 

प्रहरीले होटलबाट प्रयोग भएका तथा नभएका अस्थायी साधनहरू, प्रेग्नेन्सी टेस्ट किट तथा गर्भ निरोधक औषधीहरू समेत बरामद गरेको छ ।

पक्राउ परेका वीरबहादुर पहिले साउदी अरेबिया बसेर फर्किएका हुन् । उनले मापसेको अवैध कारोबार गरेको आरोपमा डेढ वर्ष साउदीको जेलमा सजाय भुक्तान गरेको अनुसन्धानले देखाएको छ । प्रहरीले यस धन्दामा संलग्न एक फरार आरोपीको खोजी गरिरहेको छ ।

उनीहरूविरुद्ध मानव बेचबिखन तथा ओसारपसार नियन्त्रण ऐन, २०६४ अनुसार अनुसन्धान भइरहेको छ । यस ऐनले देशभित्र वा बाहिर मानिस किन्ने वा बेच्ने, शरीर बन्धक बनाउने, वेश्यावृत्तिमा लगाउने, यौनशोषण गर्ने लगायत कार्यलाई मानव बेचबिखनको रूपमा परिभाषित गरेको छ ।

थप जानकारीका लागि हेरौं भिडियोः

​

​