बागमती प्रदेशका वन तथा वातावरणमन्त्री कृष्णप्रसाद सिलवालले बाघको आक्रमणबाट घाइते भएका चितवनका ६० वर्षीय पशुपति श्रेष्ठको उपचारमा प्रदेश सरकारले सहयोग गर्ने प्रतिबद्धता व्यक्त गरेका छन् । 

आइतबार भरतपुर महानगरपालिका–१ नारायणी नदी किनारमा हिँडिरहेका समयमा बाघको आक्रमणमा परी घाइते भएका श्रेष्ठको अवस्था बुझ्न आज अस्पताल पुगेका उनले यस्तो बताएका हुन् ।  हाल  चितवन मेडिकल कलेजमा उनको उपचार भइरहेको छ । 

श्रेष्ठको स्वास्थ्य अवस्था बुझ्दै मन्त्री सिलवालले स्वास्थ्य लाभको कामनासहित  बिरामीको अवस्थाबारे चिकित्सक र परिवारसँग बुझेका थिए । उनले बिरामीको उपचारमा कुनै कमी हुन नदिन आग्रह गर्दै केही समस्या भएमा मन्त्रालय सहयोग गर्न तयार रहेको बताए । 

श्रेष्ठलाई आक्रमण गरी घाइते बनाएको बाघलाई निकुञ्जको टोलीले आइतबार राति नै नियन्त्रणमा लिइसकेको छ ।