प्रहरी हिरासतमा बेचन झाका ४२ दिन– आरोपबारे इन्कारी बयान, मोबाइलको फरेन्सिक जाँच

नेपाली नागरिकलाई नक्कली भुटानी शरणार्थी बनाएर अमेरिका पठाउने धन्दामा ‘बिचौलीया’को भूमिका निभाउने प्रमुख पात्रमध्ये एक रहेका बेचन झा ४३ दिनदेखि प्रहरी हिरासतमा छन् ।

राजनीतिक पहुँच र प्रभाव देखाएर सिंहदरबारदेखि बालुवाटार हुँदै बुढानीलकण्ठसम्मको हवाला दिएर झाले रकम असुलेको बताइन्छ ।

झा पक्राउ परेको केहीदिनमै सत्ता समीकरण फेरिएपछि धेरैले यससँग जोडेर पनि हेरे । तर, सत्ता फेरबदलका लागि गृहकार्य भने त्यसअघिदेखिनै भइरहेको थियो ।

जिल्ला प्रहरी परिसर काठमाडौंको हिरासतमा रहेका झाको बयान सकिएको छ । उनले आफूमाथि लागेका सबै आरोपका सम्बन्धमा इन्कारी बयान दिएका छन् ।

मध्यबानेश्वरमा घर रहेका झासँग शरणार्थी गिरोहका योजनाकार केशव दुलाल, सानु भण्डारी (हाल नख्खु कारागार) बाक्लो सम्पर्कमा रहने गरेको भण्डारीकै बयानबाट खुलिसकेको छ । 

अनुसन्धान क्रममा अर्का प्रतिवादी रामशरण केसीले झालाई बुझाएको २ करोड रुपैयाँको चेक, केही अडियो रेकर्ड र तस्वीर समेत भेटिएका आधारमा प्रहरीले झाविरुद्ध पक्राउ पुर्जी जारी गरेको थियो । 

तर, प्रहरी बयानमा झाले यी सबै आरोप अस्वीकार गरेका छन् । बयानमा झाले भनेका छन्– ‘मेरो नाममा कसले कति रुपैयाँको चेक काटिदियो, मलाई थाहा छैन । अडियो पनि मेरो होइन ।’ 

झाले नेपाली कांग्रेस र नेकपा एमालेका अधिकांश नेतालाई आफूले चिन्ने कुरा भने बयानमा स्वीकारेका छन् ।

‘मैले कांग्रेस र एमालेका नेताहरू चिन्छु, तर भुटानी शरणार्थी प्रकरणलाई लिएर कसैलाई भेटेको छैन,’ झाको बयान उद्धृत गर्दै काठमाडौं प्रहरीका एक अनुसन्धान अधिकृतले भने, ‘झाले भुटानी शरणार्थी प्रकरणमा आफूलाई जोड्न नमिल्ने भनेर बयान दिएका छन् ।’ 

काठमाडौं प्रहरीले विगतमा पक्राउ परेका अन्य प्रतिवादीले गरेको बयानमा झालाई पोलेको सन्दर्भलाई समेत केलाएर हेरेको छ । 

पूर्व गृहसचिव टेकनारायण पाण्डेले राजनीतिक दलका नेताको सिफारिशमा आफूले झालाई भेटेको बयान दिएका थिए । झालाई बयानमा पोल्दा अन्य राजनीतिक दललाई समेत अनुसन्धान दबाउन दबाब हुने आशामा पाण्डेले उनको नाम लिएका थिए ।

अनुसन्धानमा संलग्न एक अधिकारीका अनुसार हिरासतमा रहेका झाले पूर्व सचिव पाण्डेलाई भने आफूले नचिनेको बयान दिएका छन् । 

बयानमा उनले भनेका छन्, ‘टेकनारायण पाण्डे सचिव हुन् भन्ने थाहा थियो तर, उनलाई म व्यक्तिगत रूपमा चिन्दिनँ । उहाँसँग संवाद हुने कुरै आउँदैन ।’

तर, पाण्डेले भने बयानमा शरणार्थी समस्यालाई राजनीतिक परियोजनाका रूपमा विकास गरेको भनेर उल्लेख गरेका थिए । 

मन्त्रालयमा राजनीतिकरूपमा सम्पर्कमा आएका बेचन झासँग बयान लिएपछि यस विषयमा थप गहिराइमा पुग्न सकिने उनले बयानमा उल्लेख गरेका थिए 

प्रहरीले झाबाट बरामद भएका दुई थान मोबाइल जाँचका लागि डिजिटल फरेन्सिक ल्याब (डीएफएल) मा पठाएको छ । डीएफएल रिपोर्ट आएको छैन । तर, मोबाइलमा भएका प्रमाणहरू झाले पहिल्यै मेटेको वा मोबाइल नै फेरेर चलाएको आशंका प्रहरीको छ । 

त्यस्तै, झाले रामशरण केसीसँग गरेको अडियो संवाद आफ्नो नभएको बयान दिएपछि प्रहरीले परीक्षणका लागि पठाएको छ । झाको नाममा भारतको बिहारस्थित मधुवनीबाट लिएको आधार कार्ड पनि उनकै हो वा होइन भनेर बुझ्न नेपालस्थित भारतीय दुतावासमा प्रहरीले परराष्ट्र मन्त्रालयमार्फत परिपत्र गरेको छ । 

झाविरुद्ध संगठित ठगीको कसुरमा ६० दिनसम्म हिरासतमा राखेर अनुसन्धान गर्ने सुविधा प्रहरीलाई छ । गत असार १४ गते भारतबाट पक्राउ गरी गड्डाचौकी हुँदै काठमाडौं ल्याएका झाविरुद्ध यथेष्ट प्रमाण नहुनु र सरकारी वकिल कार्यालयमा दिएको इन्कारी बयानका कारण मुद्दा कमजोर हुने देखिएको छ ।

जिल्ला प्रहरी परिसर काठमाडौंका प्रमुख एसएसपी वसन्त रजौरेले झाको बयान लिने काम भइसकेकाले मुद्दाको मिसिल बुझाउने प्रक्रियामा रहेको बताए । 

उनले लोकान्तरसँग भने, ‘उहाँबाट फेला परेका मोबाइल र रामशरणसँग संवाद भएको अडियोको सम्बन्धमा परीक्षणका लागि पठाइएको छ । रह्यो भारतीय आधार कार्ड, त्यसबारे भारतमा कूटनीतिक पत्राचार भएको छ ।’ 

स्रोतका अनुसार छिटो मुद्दा बुझाउन काठमाडौं प्रहरीलाई दबाब छ ।  

बेचन झाबारे केसीले बयानमा के भनेका थिए ? (उनकै शब्दमा) 

२०७८ मंसिर १३ गते मन्त्रिपरिषद्को बैठकबाट भुटानी शरणार्थी सम्बन्धमा हामीलाई काम लाग्ने केही निर्णयहरू हुन लागेको छ । उक्त निर्णय गराउन बेचन झाले केही रकमहरू मागेका छन् । उनलाई चेक काटिदिनू भनी प्रतिवादी सानु भण्डारीले भनेपछि मेरो नाममा हिमालयन बैंकमा रहेको खाताबाट बेचन झाको नाममा २ करोडको चेक काटी मेरो दस्तखत समेत गरी उक्त चेक बेचन झालाई काठमाडौंस्थित बानेश्वर ह्वाइट हाउसअगाडि बाटोमा २०७८ मंसिर ८ गते राति ८ बजेतिर भेटी दिएको हुँ ।

उक्त चेकको फोटो समेत खिची मेरो साथी प्रेमराज पन्थीलाई पठाएको तथा म पक्राउ पर्नुभन्दा अगाडि मेरो साथी पवित्रा राईलाई सो घटना सम्बन्धमा प्राप्त भएको कागजातहरू सुरक्षित साथ राख्न दिएकोमा निजले अनुसन्धानको क्रममा पेस गरेको हुँदा सो चेकको विवरण खुल्न आएको हो । 

बेचन झालाई चेक दिँदा मेरो मोबाइलमा उक्त चेक दिइएको भिडियो समेत खिचेकाले उक्त भिडियो आवश्यक परेमा पछि पेस गर्न सक्छु । सानु भण्डारीले भुटानी शरणार्थीका रूपमा अमेरिका पठाउने कार्यका लागि मन्त्रिपरिषद्बाटै बेचन झाले केही निर्णयहरू गराउँछन्, उक्त निर्णयहरूको आधारमा अमेरिका तथा तेस्रो मुलुकमा शरणार्थी पठाउन सजिलो हुन्छ भनेको आधारमा मैले चेकमार्फत रकम दिएको हुँ ।

पढ्नुहोस्, यो पनि :

शरणार्थी प्रकरण : ३३ जनाविरुद्ध २६ करोड बिगो, मुख्य राजनीतिक बिचौलिया बेचन झा [चेकसहित]