वैदेशिक रोजगार अनुमति प्रणाली ‘ईपीएस’को दोस्रो चरणमा उत्तीर्ण भएकाहरूको ‘स्किल टेस्ट’ भदौमा हुने भएको छ । दोस्रो चरणमा कोरियन भाषा पास भएकाहरूको ‘स्किल टेस्ट’ अर्थात्  सीप परीक्षण भदौ १८ गतेदेखि हुने भएको हो ।​​

ईपीएस कोरिया शाखाका अनुसार ‘मेन्युफ्याक्चरिङ’तर्फको दोस्रो लटका ८ हजार ९६५ परीक्षार्थीको सीप परीक्षण भदौ २५ गतेसम्म नेपाल प्रशासनिक परीक्षण प्रतिष्ठान जावलाखेलमा हुनेछ ।

गत वैशाख १ गतेदेखि साउन १६ गतेसम्म भएको दोस्रो चरणको भाषा परीक्षामा ८ हजार ९६५ परीक्षार्थी उत्तीर्ण भएका थिए ।

त्यसअघि पहिलो चरणको परीक्षा गत फागुन ७ गतेदेखि चैत २४ गतेसम्म भएको थियो । जसमा ६ हजार ३२१ जना उत्तीर्ण भएका थिए । ​​

ईपीएस कोरिया शाखाले सन् २०२३ को उत्पादनमूलक क्षेत्रतर्फको कोरियन भाषा परीक्षा गत फागुन ७ गतेदेखि शुरू गरेको थियो ।

ईपीएस शाखाले परीक्षार्थीको सङ्ख्या अत्यधिक भएकाले तीन चरणमा परीक्षा शुरू गरेको हो । 

पहिलो र दोस्रो चरणको भाषा परीक्षा सम्पन्न भइसकेको भने तेस्रो चरण परीक्षा भइरहेको छ ।

कुल १ लाख ६३ हजार ६३५ जना परीक्षार्थी रहेको भाषा परीक्षाको पहिलो चरणमा ४७ हजार ४२९ जना, दोस्रो चरणमा ७९ हजार ९३७ जना र तेस्रो चरणमा ३६ हजार १७० जना परीक्षार्थी समावेश गराएर गत फागुनदेखि ईपीएस कोरिया शाखाले परीक्षा गराउँदै आइरहेको छ ।

यस्तै, आगामी असोज २६ देखि पुस २ गतेसम्म तेस्रो अर्थात् अन्तिम चरणको परीक्षामा हुने छ ।