०९ साउन २०८३, शनिबार
नेपालकी सन्तोषी श्रेष्ठले पेरिस ओलम्पिकमा कठिन मानिने महिला म्याराथन दौड पूरा गरेकी छिन् ।
पेरिस ओलम्पिकको निर्णायक दिन म्याराथन (४२.१९५ किलोमिटर)को दौड सन्तोषीले २ घण्टा ५५ मिनेट ६ सेकेन्डमा पूरा गरेकी हुन् ।
९२ जना प्रतिस्पर्धीमा ११ जना धावकले बीचमै दौड छोडे ।
तर नेपालकी सन्तोषीले दौड पूरा गरेरै छोडिन् । उनले ७९ औं स्थान प्राप्त गरिन् । यस क्रममा भुटानी खेलाडीलाई सन्तोषीले पछाडि पारेकी हुन् ।
यस अघि सन्तोषीकै नाममा २ घण्टा ४० मिनेटमा म्याराथन पूरा गरेको राष्ट्रिय रेकर्ड थियो । तर कठिन मानिने पेरिसको म्याराथनमा थप १५ मिनेटको समय लिए पनि सन्तोषीले दौड पूरा गर्नुलाई नै उपलब्धि मानेकी छिन् ।
ओलम्पिकमा म्याराथन दौड पूरा गर्दा सन्तोषीले स्वर्ण पदक जितेको भन्दा पनि खुशी लागेको बताएकी छिन् । १५ किलोमिटरसम्म राम्रो गतिमा दौडिए पनि उकालोसहितको कठिन पिचमा विस्तारै गति कम गर्दै दौड पूरा गर्नतिर लागेको उनले बताइन् ।
महिला म्याराथनको स्वर्ण पदक नेदरल्याण्डस्की हसन सिफनले २ घण्टा २२ मिनेट ५५ सेकेण्डमा पूरा गर्दै जितिन् ।
२ घण्टा २२ मिनेट ५८ सेकेन्डमा पूरा गर्दै इथियोपियाकी असेफा टेगेस्टले कास्य पदक हात पारिन् । उनी तीन सेकेन्डले मात्रै स्वर्णबाट वञ्चित हुन पुगिन् ।
२ घण्टा २३ मिनेट १० सेकेन्डमा दौड पूरा गर्दै केन्याकी ओबिरी हलेनले कास्य पदक हात पारिन् ।
स्वर्ण जितेका खेलाडीले उनलाई फिनिसिङलाइनमा बधाई दिएका थिए ।
