२५ जेठ २०८३, सोमबार
गृहमन्त्री रमेश लेखकसँग नेपाल भ्रमणमा रहेका भारतीय विदेश सचिव विक्रम मिस्रीले भेटवार्ता गरेका छन् ।
सिंहदरबारस्थित गृह मन्त्रालयमा आज भएको भेटमा उनीहरूबीच द्विपक्षीय हित र चासोका विषयमा छलफल भएको गृहमन्त्रीको सचिवालयले जनाएको छ ।
भेटमा गृहमन्त्री लेखकले नेपाल र भारतबीच सौहार्दपूर्ण सम्बन्ध रहीआएको उल्लेख गर्दै विदेश सचिव मिस्रीको कार्यकालमा यो सम्बन्ध थप विस्तार र सुदृढ हुनेमा आफू विश्वस्त रहेको बताए ।
भारत नेपालको सुरक्षा, पूर्वाधार, ऊर्जा, जलश्रोतलगायत क्षेत्रमा महत्वपूर्ण विकास साझेदार रहेको उल्लेख गर्दै उनले भारतले नेपाल प्रहरी र सशस्त्र प्रहरी बलको क्षमता अभिवृद्धिसहित नेपालको पूर्वाधार निर्माणमा पुर्याएको सहयोगका लागि विदेश सचिव मिस्रीलाई धन्यवाद दिए । भेटमा गृहमन्त्री लेखकले नेपालको भूमि आफ्ना छिमेकी राष्ट्रका विरुद्ध प्रयोग हुन नदिने प्रतिवद्धता व्यक्त गरे ।
