भक्तपुरको गठ्ठाघरमा ट्रकले स्कूटर चालकलाई ठक्कर दिएसँगै अहिले उक्त क्षेत्र तनावग्रस्त बनेको छ । बिहीवार अपरान्ह काठमाडौंको काेटेश्वरबाट भक्तपुरतर्फ जाँदै गरेको ट्रकले स्कूटरलाई ठक्कर दिएको थियो । 

जिल्ला प्रहरी परिसर भक्तपुरका प्रमुख एसपी वेद विष्टका अनुसार अहिले स्थानीयले ढुंगामुडा गरेर प्रहरीलाई त्यस ठाउँमा जान दिएका छैनन् । सडक नै अवरुद्ध भएको छ । 

प्रहरीले स्थिति नियन्त्रणमा लिने प्रयास गरिरहेको छ । ट्रकले स्कूटर चालकलाई घिसार्दा उनको घटनास्थलमै मृत्यु भएको प्रहरीको भनाइ छ ।

एसपी विष्टका अनुसार क्रेनले ट्रक उठाएपछि मात्रै च्यापिएकी स्कूटर चालकलाई झिक्न मिल्छ । उनले भने, ‘क्रेन घटनास्थल पुगिसकेको छ, स्थिति नियन्त्रणमा आउनेबित्तिकै हामी स्कूटर चालकको शव निकाल्छौं ।’ 

अहिले मृतकको नाम खुलिनसकेको जानकारी विष्टले दिए ।