२९ असार २०८३, सोमबार
सहकारी ठगीबारे छानबिन गर्न गठित संसदीय छानबिन विशेष समितिले ओरियन्टलसँगै विभिन्न वचत तथा ऋण सहकारी संस्थाका अध्यक्ष तथा सञ्चालक सुधीर बस्नेतसँग सोधपुछ गरेको छ ।
झण्डै १० अर्ब रुपैयाँ ठगीको आरोप लागेका बस्नेतमाथि समितिले बिहीवार सोधपुछ गरेको हो ।
समितिको ४० औं बैठकले कार्यविधिअनुसार विभिन्न सहकारीको वचत दुरुपयोगमा संलग्नका रूपमा आरोपित मध्येका बस्नेतसँग सोधपुछ गरेको हो । बस्नेतमाथि आफू संलग्न रहेका सहकारी संस्थाहरू ओरियन्टल, प्यासिफिक सेभिङ, कोहिनुर हिल, कन्जुमर र भेगासबाट १० अर्ब रुपैयाँ ठगी गरेको आरोप छ ।
समितिका सभापति एवं नेकपा (एमाले)का सांसद सूर्य थापाका अनुसार बस्नेतले पीडित सर्वसाधारणलाई आफ्नो सम्पत्ति बेचेर भएपनि तिर्ने जवाफ दिएका छन् ।
सोधपुछका क्रममा उनले आफ्नो सम्पत्ति बिक्री गरेर सरकारी खातामै जम्मा गरेर पीडितलाई फिर्ता गर्ने आश्वासन दिए । उनले रोक्का गरेको आफ्नो सम्पत्ति खुलाउने वातावरण बनाइदिन समितिसँग आग्रहसमेत गरेका थिए ।
समितिले बस्नेतलाई पीडित सर्वसाधारणको रकम जसरी पनि भराउन सम्झाएको थियो । त्यसका लागि उनको नाममा रहेको सम्पत्तिका बारेमा विवरण माग गरेको गरिएको थियो ।
बस्नेतले आफ्ना नाममा भएका सम्पत्तिको विवरण, हिसाबको खातापाता लगायतका विवरणसमेत समितिलाई बुझाएका छन् ।
