एक वर्षमा बैंक तथा वित्तीय संस्थाहरूबाट मार्जिन प्रकृतिको शेयर धितो कर्जा प्रवाह १८ प्रतिशतले बढेको छ । आर्थिक वर्ष २०८०/८१ मा मार्जिन प्रकृतिको शेयर धितो कर्जा प्रवाह १८.१ प्रतिशतले बढेको हो ।

बैंक तथा वित्तीय संस्थाहरूले कुल ९० अर्ब ९ करोड ३२ लाख रुपैयाँ बराबरको शेयर धितो कर्जा प्रवाह गरेका छन् ।

अघिल्लो आर्थिक वर्ष २०७९/८० मा यस्तो कर्जा ७६ अर्ब ३० करोड ८३ लाख रुपैयाँ प्रवाह भएको थियो । जुन १३ अर्ब ७८ करोड ४९ लाख अर्थात् १८.१ प्रतिशतले बढी हो । 

नेपाल राष्ट्र बैंकले गत असोज (२०८०)मा शेयर धितो कर्जाको १२ करोडको सीमालाई बढाएर व्यक्तिगत तर्फ १५ करोड र संस्थागत तर्फ २० करोडसम्म पुर्‍याएको थियो ।

सीमा बढाएपछि लगानी कर्ताहरूले शेयर धितो कर्जा प्रवाह बढ्ने बताएका थिए । तर, गत आर्थिक वर्षको मङ्सिर महिनासम्म बैंक तथा वित्तीय संस्थाहरूले कुल ८१ अर्ब १८ करोड रुपैयाँ शेयर धितो कर्जामा लगानी गरेका थिए । 

यता गत जेठ मसान्तसम्म आइपुग्दा बैंक तथा वित्तीय संस्थाहरूबाट ८७ अर्ब ११ करोड २७ लाख रुपैयाँ यस्तो कर्जा प्रवाह भएको देखिन्छ । भने असारसम्म आई पुग्दासम्म  उक्त शेयर धितो कर्जा करिब ४ अर्बले बढेको छ ।

मङ्सिर महिनादेखि जेठ महिनासम्म आइपुग्दाको करिब ६ महिनामा बैंक तथा वित्तीय संस्थाहरूले ६ अर्ब रुपैयाँ शेयर धितो कर्जामा लगानी गरेका छन् ।

जुन हिसाबले औसत प्रत्येक महिना करिब १ अर्ब लगानी भएको देखिन्छ ।जेठ महिनादेखि असारसम्म आइपुग्दा करिब ४ अर्बले शेयर धितो कर्जा बढेको छ । 

चालू आर्थिक वर्षको मौद्रिक नीतिले  शेयर धितो कर्जाका लागि संस्थागत तर्फको २० करोडको सीमालाई हटाएको छ ।

जसले गर्दा शेयर धितो राखेर कर्जा लिने क्रम बढ्ने लगानीकर्ताहरूले बताएका छन् । यसका साथै अहिले शेयर बजारमा पनि आइरहेको निरन्तरको उछालले गर्दा पनि बैंक तथा वित्तीय संस्थाहरूबाट यस्तो शेयर धितो कर्जाको माग बढ्दै गइरहेको बैंकर्सहरूले बताउँदै आएका छन् ।

अबको केही महिनासम्म शेयर धितो कर्जाको माग बढिरहने नेपाल बैंकर्स संघका उपाध्यक्ष सन्तोष कोइराला बताउँछन् । उनका अनुसार शेयर धितो कर्जामा प्रवाह केही समयका लागि बढे पनि पछि आफै कम हुँदै जानेछ ।

उपाध्यक्ष कोइरालाले भने, ‘पछिल्लो समय मौद्रिक नीतिपछि केही हदसम्म शेयर धितो कर्जाको माग बढेको जस्तो देखिएको हो । तर बैंकहरूले आ-आफ्नो पोलिसीअनुसार यस्तो कर्जा प्रवाह गर्ने हुन् । केही समय शेयर धितो कर्जाको माग बढ्ने देखिन्छ । त्यसपछि आफैं कम हुन्छ ।’