२३ असार २०८३, मंगलबार
वासिङ्टन– अमेरिकाको रिपब्लिकन पार्टीका सांसदहरूले राष्ट्रपति जो बाइडेनविरुद्ध औपचारिक रुपमै काङ्ग्रेसमा महाभियोग मुद्दा दर्ता गराएका छन् । रिपब्लिकनहरूले डेमोक्रेटिक नेसनल कन्भेन्सनको उद्घाटनको दिनको प्रयोग गर्दै ‘राजनीतिक हमला’ शुरू गरेका हुन् ।
रिपब्लिकनहरूको नेतृत्वमा रहेको हाउस अफ रिप्रेजेन्टेटिभ्सका तीन शक्तिशाली समितिको प्रतिवेदनमा बाइडेनमाथि उनका छोरा हन्टरको विदेशी व्यापार मामिलासँग जोडिएको भ्रष्टाचारको आरोप लगाइएको छ ।
न्यायिक समितिका प्रमुख जिम जोर्डनले छानबिनले बाइडेनले ‘आफ्नो परिवार र आफ्ना व्यापार सहयोगीहरूको निजी वित्तीय लाभका लागि सार्वजनिक पदको दुरुपयोग गरेको’ भन्ने ‘निष्कर्ष’ निकालिएको मंगलवार बताए ।
यद्यपि बाइडेनले आफ्ना छोरा हन्टरलाई फाइदा पुर्याउन आफ्नो पदको प्रयोग गरेको वा छोराको व्यवसायमा बाइडेन संलग्न रहेको भन्ने कुनै प्रत्यक्ष प्रमाण रिपब्लिकनहरूले दिएका छैनन् ।
बाबु र छोराबीचको सम्बन्धका बारेमा अनुमान र सङ्केतका आधारमा बनाइएको प्रतिवेदनमा बलियो प्रकारको परिस्थितिजन्य कुनै प्रमाण छैन । प्रतिवेदनमा लगाइएको आरोपहरू बाराक ओबामाको उपराष्ट्रपतिका रूपमा सेवा गरेपछि बाइडेन कार्यालयबाट बाहिरिएपछिको अवधिसँग सम्बन्धित थिए ।
सेवानिवृत्त हुनुअघि डेमोक्रेटिक कन्भेन्सनमा भाषण दिन र उपराष्ट्रपति कमला ह्यारिसलाई राजनीतिक मशाल सुम्पिन तयार बाइडेनले युक्रेन र चीनलगायत आफ्नो छोराका व्यावसायिक उद्यमहरूमा सहयोग गरेको आरोपलाई बारम्बार अस्वीकार गरेका छन् ।
रिपब्लिकनहरू राष्ट्रपति बाइडेनलाई दोषी देखाउने प्रयासमा लागेका छन् । यस क्रममा बाइडेनका छोरा हन्टरका विषयहरू खोतलिरहेका छन् । उनीहरूले हन्टरको विदेशी सम्बन्ध र अराजक निजी जीवनलाई मुद्दा बनाएका छन् । रिपब्लिकनहरूले हन्टरलाई लागुपदार्थको दुर्व्यसनीबाट सुधार भएको व्यक्तिका रूपमा चित्रित गरेका छन् ।
