२१ जेठ २०८३, बिहीबार
वार्स– भारतीय प्रधानमन्त्री नरेन्द्र मोदी ‘ऐतिहासिक भ्रमण’का क्रममा बुधवार पोल्यान्ड पुगेका छन् ।
रुस–युक्रेन युद्धको ‘शान्तिपूर्ण समाधान’का लागि अभियान शुरू गर्न यसै साताको अन्त्यमा युक्रेनको भ्रमण गर्नुअघि उनी पोल्यान्ड पुगेका हुन् ।
युक्रेनको भ्रमण गर्ने मोदी पहिलो भारतीय प्रधानमन्त्री हुनेछन् । साथै उनी ४५ वर्षमा पोल्यान्डको भ्रमण गर्ने पनि पहिलो भारतीय प्रधानमन्त्री हुनेछन् ।
पोल्यान्ड युक्रेनको कट्टर सहयोगी तथा छिमेकी देश हो र युक्रेनको राजधानी किएभ जाने विदेशी नेताहरूका लागि पोल्यान्ड महत्त्वपूर्ण ‘ट्रान्जिट’ पनि हो ।
मोदीले बिहीवार पोलिश प्रधानमन्त्री डोनाल्ड टस्क र राष्ट्रपति आन्द्रेज डुडाका साथै यस मुलुकमा रहेका भारतीय नागरिकहरूसँग भेट्ने कार्यक्रम छ ।
उनको भ्रमणअघि पोल्यान्डका उपप्रधानमन्त्री व्लादिस्लाव कोसिनियाक–कामिजले पत्रकारहरूसँग भने, ‘पोल्यान्डलाई भारतसँग दिगो साझेदारीको आवश्यकता छ ।’
मोदीले रुससँग भारतको ऐतिहासिक रूपमा न्यानो सम्बन्ध कायम राख्नुका साथै क्षेत्रीय प्रतिद्वन्द्वी चीनविरुद्ध पश्चिमी मुलुकहरूसँग घनिष्ठ सुरक्षा साझेदारी गरेर नाजुक सन्तुलन बनाएका छन् ।
उनको सरकार युक्रेनमा रुसले सन् २०२२ को आक्रमणको स्पष्ट निन्दा गर्न पन्छिएको छ । यसको सट्टा सरकारले दुवै पक्षसँग वार्तामार्फत आफ्ना मतभेदहरू समाधान गर्न आग्रह गरेको छ ।
पोल्यान्ड प्रस्थान गर्नुअघि बुधवार प्रकाशित विज्ञप्तिमा मोदीले भनेका छन्, ‘एक मित्र र साझेदारका रूपमा हामी यस क्षेत्रमा चाँडै शान्ति र स्थिरता फर्किने आशा गर्दछौँ ।’
किएभमा प्रधानमन्त्री मोदीले राष्ट्रपति भोलोदिमर जेलेन्स्कीसँग छलफल गर्ने र ‘युक्रेनमा जारी द्वन्द्वको शान्तिपूर्ण समाधानमा दृष्टिकोण साझा बनाउने’ विज्ञप्तिमा उल्लेख छ ।
मोदीको भ्रमणका क्रममा सोमवार जेलेन्स्कले ‘धेरै दस्तावेजमा हस्ताक्षर हुने अपेक्षा गरिएको’ बताए ।
जुलाईमा रुसले युक्रेनका धेरै शहरमा आक्रमण गरेको केही घण्टापछि मोदीले मस्कोको भ्रमण गरेका थिए ।रुसी राष्ट्रपति भ्लादिमिर पुटिनसँग अङ्कमाल गर्दै फोटो खिचेका थिए । जेलेन्स्कीले यसको निन्दा गरेका थिए ।
मोदीले सन् २०१९ मा पनि रुसको भ्रमण गरेका थिए र दुई वर्षपछि मस्कोले युक्रेनविरुद्ध आफ्नो आक्रामक अभियान शुरू गरेको केही साताअघि नयाँ दिल्लीमा पुटिनलाई स्वागत गरेका थिए ।
भारत धेरै हदसम्म रुसको स्पष्ट निन्दा गर्न र क्रेमलिनलाई लक्षित गर्ने संयुक्त राष्ट्रसङ्घीय प्रस्तावहरूबाट टाढा रहेको छ ।
