२४ जेठ २०८३, आइतबार
सहकारी ठगीबारे छानबिन गर्न गठित संसदीय समितिले गोरखा मिडिया नेटवर्कका सञ्चालक एवं शुरूको लगानीकर्ता छविलाल जोशी बञ्जाडेसँग सोधपुछ गरेको छ ।
नेपाल प्रहरीको डीआईजीबार्ट रिटायर्ड भएका बञ्जाडेसँग समितिले शुक्रबार बयान लिएको हो ।
सहकारी ठगीमा फरार रहेका जीबी राईका व्यापारिक साझेदार रहेका जोशीसँग सहकारीबाट गोरखा मिडियामा गएको रकमबारे समितिले सोधपुछ गरेको हो ।
नेटवर्किङ व्यवसायमा समेत जीबीका पार्टनर रहेका जोशीको घरबाट प्रहरीले विभिन्न सहकारीका सर्भर जफत गरेको थियो ।
गैरकानूनी ढंगले ऋण प्रवाह गरेका सहकारीको सर्भर जोशीको घरमा बरामद भएपछि अनुसन्धान उनीतर्फ समेत सोझिएको हो ।
गोरखा मिडिया नेटवर्कका प्रबन्ध निर्देशक रहेका रवि लामिछानेसँग सोधपुछ गर्नुअघि जोशीसँग समितिले बयान लिएको हो ।
जोशीको घरबाट बरामद भएका सर्भरमा सहकारीबाट रविले ऋण लिएको भेटिएको सूचना प्रहरीले संसदीय समितिलाई दिएको छ ।
गोरखा मिडिया नेटवर्कका अर्का सञ्चालन कुमार रम्तेलसँग पनि समितिले छलफल गरेको थियो ।
नेकपा एमालेका सांसद सूर्य थापाको संयोजकत्वमा गठित संसदीय समितिको म्याद भदौ १५ सम्म छ ।
तोकिएको समयमै प्रतिवेदन बुझाउने गरी समितिले प्रतिवेदन लेखनको कामलाई अन्तिमरुप दिँदैछ ।
रविसँगको बयान अन्तिम हुने समिति स्रोतले जानकारी दियो ।
