२९ जेठ २०८३, शुक्रबार
तनहुँको आबुखैरेनी गाउँपालिका–४ स्थित ऐनापहराबाट मर्स्याङ्दी नदीमा खसेको भारतीय यात्रुवाहक बसलाई क्रेनको सहायताले पानीबाट १० मिटर बाहिर ल्याइएको छ ।
शनिवार सशस्त्र प्रहरीको विपद् व्यवस्थापन तालिम शिक्षालय कुरिनटारबाट खटिएको ५२ जनाको सुरक्षा फौजले बसलाई पानीबाहिर निकालेको हो ।
बस निकाल्नका लागि दमौलीबाट प्राइभेट क्रेन प्रयोग गरिएको सशस्त्रका सहप्रवक्ता डीएसपी शैलेन्द्र थापाले जानकारी दिए ।
उक्त बसलाई पानीबाट बाहिर निकाले पनि अप्ठ्यारो जमिनका कारण सडकसम्म निकाल्न भने सकिएको छैन । आइतवार पनि बस निकाल्ने कार्य जारी रहने सहप्रवक्ता थापाले बताए ।
शुक्रवार पोखराबाट काठमाडौं आउँदै गरेको बस दुर्घटना हुँदा २७ भारतीयको मृत्यु भएको छ । साथै १६ जना घाइते भएका छन् ।
भारतीय एयर फोर्सको जहाजले चितवनबाट शब लिएर स्वदेश फर्किएको छ । घाइतेहरूको काठमाडौंको महाराजगञ्जस्थित शिक्षण अस्पतालमा उपचार भइरहेको छ ।
