नेकपा (एमाले)का सचिव योगेश भट्टराईले माओवादी सशस्त्र संघर्षलाई ‘हिंसा’ भनेपछि संसदमा हंगामा भएको छ । बुधवार बसेको प्रतिनिधिसभा बैठकको विशेष समयमा भट्टराईले बोल्दै गर्दा माओवादी हिंसा नभएको भए जलविद्युत् क्षेत्रले पहिले नै फड्को मार्ने बताएका थिए । 

माओवादी आन्दोलनलाई हिंसा भनिएको भन्दै नेकपा (माओवादी केन्द्र)का सांसदहरूले उठेर आपत्ति जनाए । माओवादी केन्द्रका सांसद माधव सापकोटाले माओवादी आन्दोलनलाई हिंसा भनिनु संविधानविपरीत भएको दाबी गरे । तर भट्टराईले हिंसा नै हो भनिरहे ।

त्यसपछि माओवादीका अरू सांसद पनि उठेर विरोध जनाए । सभामुख देवराज घिमिरेले आफ्नो ध्यानाकर्षण भएको भन्दै माओवादी सांसदलाई बस्न आग्रह गरे । तर माओवादी सांसदले मानेनन् ।

 माओवादीका सचिव देवेन्द्र पौडेलले माओवादी आन्दोलनलाई हिंसा भनिएकोमा आपत्ति जनाउँदै सो शब्द फिर्ता गर्न माग गरे । भट्टराईले फेरि भने, ‘हिंसै हो नि सभामुख महोदय । हिंसा हो, हिंसाबाहेक केही होइन ।'

त्यसपछि माओवादी सांसदहरू झनै आक्रोशित भए । यसपछि पनि भट्टराई रोकिएनन् । ‘तपाईंले धम्की दिएर कोही डराउँदैन । हिंसा हो,’ उनले भने । माओवादी र एमाले सांसदहरूबीच भनाभन भएपछि परिस्थिति सम्हाल्न सभामुखलाई हम्मे–हम्मे परेको थियो ।