सरकारले टेलिकम सेवा प्रदायक कम्पनी एनसेलको लाइसेन्स नवीकरण गरेको छ । नेपाल दूरसञ्चार प्राधिकरणले कम्पनीको लाइसेन्स नवीकरण गरेको एनसेलका एक अधिकारीले बताए ।

‘प्राधिकरणले एनसेलको लाइसेन्स नवीकरण गरेको छ । हामीलाई आइतबार राति मात्रै जानकारी आएको हो,' एनसेलका ती अधिकारीले लोकान्तरसँग भने, 'हामीले पहिले नै पहिलो किस्ताको रकम बुझाइसकेका थियौँ । प्राधिकरणबाट हिजो मात्रै लाइसेन्स नवीकरणको जानकारी आएको हो ।’

एनसेलले गत जेठमै पहिलो किस्ताबापत्को अग्रिम ४ अर्ब रकम बुझाएर लाइसेन्स नवीकरणका लागि प्राधिकरणमा निवेदन दिएको थियो । त्यसैको बाँकी एक अर्ब हाल बुझाएको हो ।

नेपाल दूरसञ्चार प्राधिकरणका प्रवक्ता प्रदीप पौडेलले एनसेलले पहिलो किस्ताबापत्को बाँकी एक अर्ब रुपैयाँ बुझाएको जानकारी दिए । 

सरकारले गत बिहीबार एनसेलको लाइसेन्स नवीकरण गर्ने निर्णय गरेको थियो । मन्त्रिपरिषद् बैठकले नवीकरण शुल्कवापत् एनसेलले तिर्नुपर्ने रकम चार किस्तामा बुझाउन सक्नेगरी निर्णय गरेको थियो । 

तिर्नुपर्ने २० अर्बमध्ये ५ अर्ब रुपैयाँ बुझाइसकेको र बाँकी १५ अर्ब रुपैयाँ एनसेलले तीन किस्तामा तिर्न पाउने छ । किस्ता तिर्दा १० प्रतिशत ब्याज पनि तिर्नुपर्ने छ ।