०५ साउन २०८३, मंगलबार
शिद्धबाबा सुरूङमार्ग ४९० मिटर खनिएको छ । एक हजार १२६ मिटर लामो सुरुङमा दुवै तर्फबाट ४९०.८६ मिटर खनिएको छ । सोमवारसम्म उत्तरतर्फबाट २१४.८६ र दक्षिणतर्फबाट २७६ मिटर खनिएको सिद्धबाबा सुरुङमार्ग आयोजनाले जनाएको छ ।
सुरुङमार्गका तीनवटा बाइपास रहेका छन् । पहिलो बाइपास ११६, दोस्रो १०२ र तेस्रो १०५ मिटर खनिएको छ । आयोजनाको कुल भौतिक प्रगति २१.४ प्रतिशत रहँदा वित्तीय प्रगति २३.८ प्रतिशत रहेको आयोजनाले जनाएको छ ।
सिद्धार्थ राजमार्गअन्तर्गत पाल्पाको सिद्धबाबा सुरुङ मार्गमा विस्फोटक पदार्थ प्रयोग गरेर चौबीसै घण्टा खन्न थालिएको छ । कुनै समस्या नआए अबको १०० दिनभित्र सुरुङको ‘ब्रेक थ्रू’ हुने भौतिक पूर्वाधार तथा यातायातमन्त्री देवेन्द्र दाहालले बताएका छन् ।
अहिले सुरुङ निर्माण कार्य तीव्र गतिमा अघि बढेको छ । आयोजनाको ठेक्का चाइना स्टेट कन्स्ट्रक्सन इन्जिनियरिङ कम्पनीले सात अर्ब ३४ करोड २१ लाख रुपैयाँमा लिएको छ ।
