महोत्तरीसहित तराई मधेशमा उदाउँदो चन्द्रमालाई अर्घ्य दिँदै चौठचन्द्र पर्व (चन्द्रमाको पूजा) सम्पन्न भएको छ ।

श्रद्धा र आस्थाको महान् पर्वका रूपमा मानिएको यो पर्व गएराति आकाशमा चन्द्रमा उदाएपछि चन्द्रमालाई विभिन्न वस्तुको अर्घ्य अर्पण गर्दै सम्पन्न भएको हो ।

यस पर्वलाई मिथिलाञ्चलको गाउँबस्तीमा चौरचन पर्वको नाउँले पनि सम्बोधन गरिन्छ । 

प्रत्येक घरका ज्येष्ठ महिलाले दिनभरि निराहार उपवास बसी राति चन्द्रमाको पूजाआजा गरेका हुन् ।

यस पर्वमा फलफूल, मिठाई, दही, पूरी र खीर खाने चलन रहेको छ । 

यस पर्वका लागि तराई मधेशका सम्पूर्ण घर–घरमा केरा, स्याउ, नरिवल, अनार, अम्बा, नासपाती, मकै, निम्बु तथा विभिन्न प्रकारका मिठाई र दही दुई/तीन दिनपहिलेदेखि नै जोहो गरेर राखिएको हुन्छ ।