‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सर्वोच्च अदालतका प्रधानन्यायाधीश सिफारिस गर्न बसेको संवैधानिक परिषदको बैठक अनिर्णित बनेको छ । शुक्रवार प्रधानमन्त्री निवास बालुवाटारमा बसेको बैठक अनिर्णित बनेको हो ।

अब भदौ ३१ गते फेरि बस्ने गरी बैठक सकिएको उपसभामुख इन्दिरा रानार्ले  जानकारी दिइन् । संवैधानिक निकायमा सिफारिस गर्न पहिले पर्याप्त अध्ययन गर्नुपर्ने निष्कर्षपछि ठोस् निर्णय नगरी बैठक सकिएको उनको भनाइ छ । ‘अब ३१ गते बैठक बसेर टुंगो लगाउने सम्भावना प्रबल छ,’ उनले भनिन् ।
सर्वोच्चका प्रधानन्यायाधीश विश्वम्भरप्रसाद श्रेष्ठ आगामी असोज १८ गतेदेखि ६५ वर्षे उमेरहदका कारण अवकाशमा जाने भएकोले नयाँ प्रधानन्यायाधीश सिफारिस गर्ने लागिएको हो । 

न्यायपरिषद्को बैठकले वरिष्ठतम न्यायाधीश प्रकाशमानसिंह राउत, सपना प्रधान मल्लसहित ८ न्यायाधीशको संवैधानिक परिषद्मा पठाइसकेको छ । एक महिनाअगाडि नै नियुक्तिका लागि नाम सिफारिस गर्नुपर्ने भए पनि ढिलो गरी परिषद्को बैठक बसिरहेको हो । शुक्रबारको बैठकमा राउतको विषयमा केही प्रश्न उठेको बताइएको छ । 
००००
लगानी बोर्डका नवनियुक्त प्रमुख कार्यकारी अधिकृत (सीईओ) सुशील ज्ञवालीले पदभार ग्रहण गरेका छन् । 

शुक्रबार बोर्डको कार्यालयमा पुगेर उनले पदभार ग्रहण गरेका हुन् । सो क्रममा उनलाई बोर्डका पदाधिकारीहरुले स्वागत गरेका थिए । 

पदभार ग्रहण गर्दै ज्ञवालीले न्यानो स्वागतका लागि बोर्डका पदाधिकारीहरुलाई धन्यवाद दिँदै ठूला र रणनीतिक आयोजनालाई समयसीमाभित्र सफल बनाउन राजनीतिकदेखि संगठनात्मक तहसम्मको संयुक्त प्रयास आवश्यक रहेकोमा जोड दिए ।
००००
नेपाली सेना र अमेरिकी सेनाबिच संयुक्त अभ्यास हुने भएको छ । भाद्र ३० गतेदेखि आश्विन ०४ गतेसम्म दुई देशका सेनाबीच संयुक्त अभ्यास ‘प्यासिफिक एन्जल’ सञ्चालन लागेको सैनिक जनसम्पर्क तथा सूचना निर्देशनालयले शुक्रबार जनाएको छ । 

अभ्यासमा विभिन्न प्रकारका विपद्को दौरान सञ्चालन गरिने खोज तथा उद्धार कार्यलाई थप प्रभावकारी बनाउन अपनाउनु पर्ने विद्यमान विधि तथा प्रक्रियाहरूका सम्बन्धमा ज्ञान आदान प्रदान हुने छ ।
००००
नेपाली राष्ट्रिय क्रिकेट टोलीका कप्तान रोहितकुमार पौडेल र करातेकी एरिका गुरुङ वर्षको उत्कृष्ट खेलाडी घोषित भएका छन् । 

नेपाल खेलकुद पत्रकार मञ्चले शुक्रबार आयोजना गरेको पल्सर स्पोर्टस अवार्डमा रोहित पुरुषतर्फ र एरिका महिलातर्फ उत्कृष्ट खेलाडी घोषित भएका हुन्। रोहितले आफ्नै सहकर्मी दीपेन्द्रसिंह ऐरी, फुटबलका अनन्त तामाङ, गल्फका सुवास तामाङ र करातेका मोहमद शेख आलमलाई पछि पार्दै उक्त अवार्ड जितेका हुन् । 
००००
नेकपा एमालेले वार्षिक कार्ययोजना पारित गरेको छ । ललितपुर, च्यासलस्थित पार्टी केन्द्रीय कार्यालयमा बसेको सचिवालय बैठकले पोलिटब्युरो बैठकले दिएको सुझावका आधारमा कार्ययोजना पारित गरेको एमाले महासचिव शङ्कर पोखरेलले जानकारी दिए । 

उनका अनुसार कार्ययोजनामा विभिन्न १८ वटा विषय समेटिएको छ । पार्टी सदस्यता नवीकरण र अभिलेखीकरण, नियमित अधिवेशन, बाँकी रहेका जिल्ला अधिवेशन कात्तिक मसान्तभित्र सम्पन्न गर्ने विषय कार्ययोजनामा समेटिएको छ ।  सबै तहको अधिवेशन मङ्सिर मसान्तभित्र सम्पन्न गरिसक्ने गरी योजना बनाइएको उनले बताए ।
००००
नेपाल कम्युनिष्ट पार्टी माओवादी केन्द्रले राष्ट्रियसभाअन्तर्गतको समिति सभापतिमा उम्मेदवारी दिने निर्णय गरेको छ ।
सिंहदरबारमा बसेको संसदीय दलको बैठकले सार्वजनिक नीति तथा प्रत्यायोजित विधायन समितिमा उम्मेदवारी दिने र उम्मेदवारमा सांसद मायाप्रसाद शर्मालाई उठाउने निर्णय गरिएको प्रमुख सचेतक हितराज पाण्डेले जानकारी दिए ।

यसैगरी प्रमुख प्रतिपक्षी दल नेकपा माओवादी केन्द्रले ‘माओवादी हिंसा’ भन्ने शब्द संसद्को रेकर्डबाट नहटेसम्म संसद् बैठक चल्न नदिने निर्णय गरेको छ ।
००००
जनमत पार्टीका अध्यक्ष डा सीके राउतले डिभोर्सका लागि ललितपुर जिल्ला अदालतमा दायर गरेको मुद्दामा श्रीमती सिन्धु रानीमाथि गम्भीर आरोप लगाएको पाइएको छ ।

श्रीमतीले पटक–पटक आत्महत्या प्रयास गरेको, आफैं डिभोर्स माग्ने गरेको, काठमाडौंमा घर गाडीलगायतका लागि टर्चर गरेको, छोराछोरीको ज्यान जोखिममा पारेको लगायत आरोप राउतले लगाएका छन् । भदौ १२ गते दायर मुद्दामा श्रीमतीलाई अंश दिएर सम्बन्धविच्छेद गराइदिन माग गरिएको छ ।
००००
सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिले मितेरी सहकारीमा स्थलगत अनुगमन गरेको छ ।

बिहीबार समितिका सभापति सूर्य थापासहितको टोलीले मितेरीसहित अन्य १३ सहकारीमा अनुगमन गरेको हो ।
मितेरी सहकारीको रकम हिनामिनामा नेपाली कांग्रेसका उपसभापति धनराज गुरुङ पनि मुछिएका छन् ।

समितिले मितेरी सहकारीका अध्यक्ष कुम्भराज गुरुङसँग रकम हिनामिनाबारे छलफल गरेको थियो ।
००००
राइड शेयरिङ बन्द गर्नुपर्ने माग राख्दै ट्याक्सी चालकहरू आन्दोलनमा उत्रिएका छन् ।
रातो नम्बर प्लेटका सवारीसाधनले यात्रु बोक्न नपाउनेलगायतका माग गर्दै उनीहरू आन्दोलन उत्रिएका हुन् ।
००००
बागलुङको गलकोट नगरपालिका–२ भुङ्खानीमा भएको जीप दुर्घटनामा रुकुम पूर्वको पुथा उत्तरगङ्गा गाउँपालिकाकी उपाध्यक्ष भुपेन्द्रा बुढाको निधन भएको छ ।
दुर्घटनामा ३३ वर्षीया बुढासँगै उनकी आमा ६१ वर्षीया गोपीमाया बुढा तथा अर्का एक पुरुषको समेत मृत्यु भएको हो । 
००००​
नेपाली बजारमा शुक्रबार सुनको मूल्य हालसम्मकै उच्च विन्दुमा पुगेर कीर्तिमान कायम गरेको छ ।

नेपाल सुनचाँदी व्यवसायी महासङ्घका अनुसार सुनको मूल्य तोलामा रु तीन हजारले वृद्धि भएको हो ।

बिहीबार प्रतितोला रु एक लाख ५३ हजार तीन सयमा कारोबार भएको छापावाला सुन शुक्रबारका लागि रु एक लाख ५६ हजार तीन सय निर्धारण भएको छ ।