राष्ट्रिय स्वतन्त्र पार्टी (रास्वपा) सभापति रवि लामिछानेले केपी शर्मा ओली नेतृत्वको सरकार अधिनायकवादको बाटोमा लागेको आरोप लगाएका छन् । आइतबार राति पार्टी कार्यालयमा भेला भएका समर्थकलाई सम्बोधन गर्दै उनले आफूलाई पक्राउ गर्ने तयारीमा सरकार लागेको आरोप लगाएका हुन् । 

‘मैले बुझे अनुसार कुनै पनि त्यस्तो तयारी गरेको छैन, पक्राउ पुर्जी जारी गरिएको छैन भनिएको छ । तर सरकारको विश्वास गर्ने अवस्थामा तयार छैनौँ,’ लामिछानेले भने । सहकारी ठगीमा गोरखा मिडियाका सञ्चालक छविलाल जोशी पक्राउ परेपछि प्रहरीले लामिछानेलाई निगरारीमा राखेको छ ।  

सहकारी छानबिन सम्बन्धी संसदीय समितिले गोरखा मिडियामा आएको सकारीका रकम हिनामिनामा लामिछाने संलग्न रहेको निष्कर्षसहित कारबाही सिफारिस गरेको थियो । सरकारले समितिको सो प्रतिवेदन तत्काल कार्यान्वयनमा लैजाने निर्णय गरिसकेको छ । 

लामिछानेले आफूमाथि राजनीतिक प्रतिशोध साधिएको आरोप लगाए । ‘पञ्चायतमा यस्तो भएको सुनेका छौँ, यो के गर्न खोजेको ? अनुसन्धानको कुन कसीमा उभिनु पर्छ तयार छौँ । लैजानुस म तयार छु, म छानबिनका लागि तयार छु’ उनले भने, ‘सरकार अधिनायकवाद जाँदैछ कि भन्ने सङ्केत देखिएको छ ।’

लामिछानेले सहकारीको रकम हिनामिनामा समितिले आफ्नो संलग्नता नभेटेको दाबी गरे। रविलाई पक्रिने तयारी भएको भन्दै रास्वपा कार्यकर्ता पार्टी कार्यालयमा भेला भएका थिए ।