‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
बडा दशैं शुरू हुन ठ्याक्कै एक साता बाँकी छ । काठमाडौं उपत्यका ट्राफिक प्रहरी कार्यालयले दशैंमा मात्रै १५ लाखदेखि १८ लाख मानिसले काठमाडौं छाड्ने अनुमान गरेको छ । 

यसका लागि पाँच हजारदेखि छ हजार सार्वजनिक सवारीसाधन तयारी अवस्थामा राखिएको छ । सरकारले दशैंमा काठमाडौं छाड्नेका लागि लक्षितगरी यही असोज १२ गते शनिबारदेखि अग्रिम टिकट काट्न पाइने निर्णय गरिसकेको छ ।

भौतिक पूर्वाधार तथा यातायातमन्त्री देवेन्द्र दाहालले सडक मर्मतलाई तीव्रता दिँदै घटस्थापनाअघि नै खाल्डाखुल्डी पुर्न र सडक सुरक्षा बढाउन मातहतका निकायलाई निर्देशन दिइसकेका छन् । 

जसअनुसार दशैंसम्म तीन हजार आठ सय ५६ दशमलव ४१ किलोमिटर सडकलाई खाल्डोसहित बनाउने लक्ष्य लिइएको छ । जसमध्ये सोमबारसम्म सात सय ७२ दशमलव ८५ किलोमिटर सडकमा काम भइसकेको छ ।
००००
आईसीसी विश्वकप क्रिकेट लिग–२ अन्तर्गत हिजोराति हुने तय भएको नेपाल र ओमानबीचको खेल वर्षाका कारण रद्द भएको छ । 
क्यानडाको किङसिटीमा राति ८ः४५ बजेदेखि हुने भनिएको खेल लगातार पानी परेपछि टससमेत हुन नसकी रद्द भएको हो ।
००००
राष्ट्रिय स्वतन्त्र पार्टी (रास्वपा)का सभापति रवि लामिछानेले सरकारले आफूलाई दशैंको आसपास संगठित अपराधको आरोपमा पक्रने प्रपञ्च गरिरहेको बताएका छन् । संसदीय छानबिन समितिले नै सहकारी ठगीमा आफ्नो संलग्नता नभएको भने पनि राजनीति नै सिध्याउन आफूलाई संगठित अपराध मुद्दामा पक्रिन खोजिएको आशंका उनले व्यक्त गरेका हुन् ।  

‘मलाई पक्राउ गर्न दशैँ कुर्नु पर्दैन । आधार प्रमाणले यी चिज देखियो भन्नुस्, मेरो झोला रेडी छ । तर, छलछाम स्वीकार्य छैन,’ मंगलवार फेसबूक लाइभमार्फत् लामिछानेले भने । तर छलछाम गर्ने, लडाउन र तर्साउन खोज्ने, मिडिया ट्रायल गर्ने तथा आफ्नो वरिपरि प्रहरी घुमाउने काम आफूलाई स्वीकार्य नहुने उनको भनाइ छ ।
००००
प्रहरी प्रधान कार्यालयको मानव स्रोत विकास विभागले नेपाल प्रहरीका ४१ जना एसपी र १४३ जना डीएसपीको सरुवा गरेको छ । प्रहरी महानिरीक्षक (आईजीपी) वसन्तबहादुर कुँवर लागुऔषधसम्बन्धी कार्यशाला गोष्ठीमा सहभागी हुने शिलशिलामा ग्रीसमा रहेको बेला विभागका एआईजी भीम ढकालले प्रहरी अधिकृतको सरुवा गरेका हुन् । 

यो सरुवामा निमित्त प्रहरी महानिरीक्षक टेकप्रसाद राईको असहमति हुँदाहुँदै ढकालले गृहमन्त्री रमेश लेखकसँगको सहकार्यमा सरुवा गरेको बताइएको छ । आईजीपी कुँवरले एक साताअघि नै बुझाएको सरुवा सूची संशोधन गर्दै गृहमन्त्री लेखकले सरुवा सूची निकाल्न एआईजी ढकाललाई निर्देशन दिएसँगै सरुवाले वैधानिकता पाएको हो ।

आईजीपी कुँवरले जिल्लामा एसपी र इलाका प्रहरी कार्यालयमा डीएसपी पठाउँदा उनीहरूको ट्रयाक रेकर्ड हेरेर मात्रै पठाउनुपर्ने राय गृहमन्त्री लेखकलाई दिएका थिए । गृहमन्त्री लेखकले आईजीपी कुँवरलाई भने उनी ग्रीसबाट फर्केपछि मात्रै सरुवा सूची निकाल्ने आश्वासन दिएका थिए । 
सरुवा सूची निकाल्नुअघि आईजीपीसँग अनिवार्य परामर्श गर्नुपर्ने दायित्वबाट विमुख हुँदै एआईजी ढकालले गृहमन्त्री लेखकको निर्देशनलाई अक्षरशस् पालना गर्दै सरुवा गरेका हुन् । 
००००
हठात सत्ता छाड्नुपरेपछि विपक्षीका रूपमा सँगै मोर्चाबन्दीमा रहे पनि नेकपा माओवादी केन्द्रले सहकारी ठगी प्रकरणमा राष्ट्रिय स्वतन्त्र पार्टी (रास्वपा)लाई साथ नदिने भएको छ । 

नेपाली कांग्रेस र नेकपा एमालेबीच गत असार १७ गते नयाँ समीकरण बनाउने सहमति भएपछि असार ३० गते माओवादी र रास्वपा बाहिरिएका थिए । तत्कालीन प्रधानमन्त्री पुष्पकमल दाहाल ‘प्रचण्ड’कै आग्रहमा रास्वपाले सरकारलाई दिएको समर्थन फिर्ता नलिई विश्वासको मतको प्रक्रियासम्म पुगेको थियो ।
००००
गोरखा मिडिया नेटवर्कका सञ्चालक समितिका सदस्य एवं पूर्वडीआइजी छविलाल जोशी बन्जाडेसँग मंगलबार जिल्ला सरकारी वकिलको कार्यालय कास्कीले दुई घण्टा बयान लिएको छ । 

जिल्ला प्रहरी कार्यालय कास्कीले छविलालविरुद्ध सहकारी ठगी र संगठित अपराध मुद्दामा अनुसन्धान शुरू गरेको छ । प्रहरीले नै उनलाई सरकारी वकिल कार्यालयमा पेश गरेको थियो । 
००००
राप्रपाका वरिष्ठ उपाध्यक्ष रवीन्द्र मिश्रले काठमाडौं क्षेत्र नम्बर १ मा आगामी निर्वाचनमा प्रकाशमानलाई हराएरै छोड्ने चेतावनी दिएका छन् ।

यसअघि दुवैपटक सिंहसँग हारेका मिश्रले सामाजिक सञ्जालमा लेख्दै सिंह आफूसँग हारेको दिन देशको वास्तविक रुपान्तरणको शंखनाद हुने घोषणा गरेका हुन् ।
००००
जग्गाको सिफारिस गर्दा घुस लिएको आरोप लगाउँदै नेत्रविक्रम चन्द विप्लव नेतृत्वको नेपाल कम्युनिस्ट पार्टीका कार्यकर्ताले वडाध्यक्षलाई नियन्त्रणमा लिएका छन् ।  

उनीहरूले ८० हजार रुपैयाँ नगदसहित झापाको बुद्ध शान्ति गाउँपालिका २ का वडाध्यक्ष डिल्लीप्रसाद ओली ‘गोपाल’ लाई मंगलवार नियन्त्रणमा लिएका हुन् ।
००००
नेपाल स्टक एक्सचेन्ज (नेप्से) उच्च अङ्कले घटेको छ ।

मङ्गलबार नेप्से ५८.९३ अङ्कले घटेर २४७०.३९ को विन्दुमा कायम भएको हो ।

यस दिन बजारमा १ करोड ५५ लाख ४ हजार ९२९ कित्ता शेयरको खरिदबिक्री हुँदा ५ अर्ब ६८ करोड ९५ लाख ६१ हजार रुपैयाँको कारोबार भएको छ ।
००००
शैक्षिक प्रमाणपत्र पेश गर्न नसकेपछि श्रीलंकाका लागि राजदूतमा प्रस्तावित रामकृष्ण भट्टराईले आफ्नो नाम फिर्ता लिएका छन् ।

स्नातक तह उत्तीर्ण भएको प्रमाणपत्र पेश गर्न समितिले मंगलबार दिउँसो ३ बजेसम्मको समय दिएको थियो ।

संसदीय सुनुवाइ विशेष समितिले मंगलबार उनको सम्बन्धमा निर्णय गर्ने तयारी गरेको थियो ।
००००
सर्वोच्च अदालतले प्रहरी हिरासतमा रहेका मेडिकल व्यवसायी दुर्गा प्रसाईंलाई रिहा गर्न अस्वीकार गरेको छ ।

आफूलाई थुनामुक्त गर्न माग गर्दै प्रसाईंले दिएको बन्दीप्रत्यक्षीकरण रिटमा सर्वोच्च अदालतले मंगलबार कारण देखाऊ आदेश जारी गरेको छ ।
न्यायाधीश प्रकाशमान सिंह राउतको एकल इजलासले उक्त रिटमा कारण देखाउ आदेश जारी गरेको हो ।
००००
२० औं सिनियर एसियाली कराते च्याम्पियनसिपमा ऐतिहासिक रजत पदक जितेकी एरिका गुरुङ स्वदेश फर्किएकी छिन् ।
उनलाई मंगलबार त्रिभुवन अन्तर्राष्ट्रिय विमानस्थलमा बाजागाजासहित स्वागत गरिएको हो ।

चीनको हान्झाउमा आयोजित २०औं एसिया सिनियर कराते च्याम्पियनसिपमा रजत पदक विजेता उनलाई विमानस्थलमा राष्ट्रिय खेलकुद परिषद्का सदस्यसचिव टङ्कलाल घिसिङ, नेपाल कराते महासङ्घका अध्यक्ष युवराज लामालगायत खेलपदाधिकारीले स्वागत गरेका थिए ।
००००
सूर्यदर्शन सहकारीको अनुसन्धान गर्न केन्द्रीय अनुसन्धान ब्यूरो (सीआईबी)को टोली कास्कीको पोखरा जाने भएको छ ।

विभिन्न सहकारी ठगीसँगै अन्य वित्तीय अपराधको समेत अनुसन्धान गर्दै आएको सीआईबीमा विशेषज्ञ अनुसन्धान प्रहरी अधिकृतहरू रहेकाले सीआईबीलाई कास्की पठाउन लागिएको हो ।