२२ असार २०८३, सोमबार
पर्वतको महाशिला गाउँपालिकाले आफू बसेको गाउँठाउँ छाडी अन्यत्र गएकाहरू पुरानै स्थानमा फर्किएमा एक लाख अनुदान र ६ महिनालाई पुग्ने खाद्यान्न खर्च प्रदान गर्ने भएको छ ।
गाउँलेहरू बसाइँ सर्न थालेपछि पालिकाले फर्किएर आउनेलाई अनुदान दिने योजना ल्याएको हो ।
गाउँपालिकाले चालु आर्थिक वर्षदेखि नै यो कार्यक्रम लागु गरेको गाउँपालिकाका अध्यक्ष ईश्वरीप्रसाद भुसालले बताए । गाउँ छाडेर गएकाहरू फर्किएमा उनीहरूले अनुदान पाउने उनले बताए ।
गाउँ फर्केकाहरूलाई आफ्नो खेतबारीमा अन्न फलाउन कम्तीमा ६ महिना लाग्ने भएकाले परिवारका सदस्यहरूको भरणपोषका निम्ति गाउँपालिकाले नै खाद्यान्न उपलब्ध गराउने छ । चामल, दाल, तेल, तरकारीका निम्ति पनि अनुदान दिइने उनले बताए ।
अध्यक्ष भुसालका अनुसार एक वर्षमा पालिकाबाट ९३ परिवारका तीन सय २५ जना बसाइँ सरेका छन् ।
