१९ असार २०८३, शुक्रबार
दशैंको अवधिमा कोशी प्रदेशका २६९ ठाउँमा सवारी दुर्घटना भएका छन् । जसमा १४ जनाको मृत्यु भएको छ ।
असोज १७ गते घटस्थापनादेखि असोज २९ गतेसम्म २६९ ठाउँमा भएका दुर्घटनामा परेर १४ जनाको मृत्यु भएको ट्राफिक प्रहरीले जनाएको छ ।
३९ जना गम्भीर घाइते भएको नेपाल प्रहरी राष्ट्रिय सुरक्षा तथा ट्राफिक व्यवस्थापन कार्यालय इटहरीका प्रमुख एसपी सरोज पौडेलले जानकारी दिए ।
मृत्यु हुनेमा १३ जना पुरुष र एक जना महिला छन् । दुर्घटनामा परी मृत्यु हुनेको संख्या सबैभन्दा बढी मोरङमा रहेको छ । मोरङमा ९५ ठाउँमा दुर्घटना हुँदा पाँच जनाको मृत्यु भएको छ । गम्भीर घाइते १६ जना भएका छन् ।
त्यसैगरी सुनसरीमा ६५ ठाउँमा सवारी दुर्घटना हुँदा चार जनाको मृत्यु र सात जना गम्भीर घाइते भएका छन् । त्यस्तै झापामा ७२ वटा दुर्घटना हुँदा ३ जनाको मृत्यु, धनकुटा र खोटाङमा १–१ जनाको मृत्यु भएको छ ।
१२ दिनमा ७ हजार ५९१ वटा सवारी साधनलाई कारवाही गरेर ५१ लाख ९५ हजार ५०० रुपैयाँ राजस्व असुली गरेको ट्राफिक प्रहरीले जनाएको छ ।
गत वर्ष कोशी प्रदेशमा दशैंको ६ दिनमा १३५ वटा सवारी साधन दुर्घटनामा परेका थिए ।
