२७ जेठ २०८३, बुधबार
महोत्तरीको गौशाला नगरपालिका– ३ पचाइन टोलमा करेन्ट लागेर एक किशोरीको मृत्यु भएको छ, भने दुई किशोरी घाइते भएका छन् ।
मृत्यु हुनेमा स्थानीय विहारी महतोकी छोरी १४ वर्षीया करिना कुमारी रहेको जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक सन्तुलालप्रसाद जैसवालले जानकारी दिए ।
आज बिहान खेतमा धान काट्नका लागि दुई दिदीबहिनीसँग जाँदै गर्दा उनीहरूलाई करेन्ट लागेको थियो ।
प्रहरीका अनुसार स्थानीय विनोद महतोले जङ्गली जनाबरबाट बाली जोगाउन खेतमा लगाएको बिजुलीको नाङ्गो तारबाट उनीहरूलाई करेन्ट लागेको हो ।
करेन्ट लागेर करिनाको घटनास्थलमै मृत्यु भएको हो ।
बहिनीलाई बचाउने क्रममा उनकी दिदी १८ वर्षीया राधा र १४ वर्षीया विभाकुमारी महतो घाइते भएका छन् ।
उनीहरू दुवै जनाको गौशालास्थित निजी क्लिनिकमा उपचार भइरहेको छ । हाल उनीहरू स्वास्थ्य अवस्था खतरामुक्त रहेको प्रहरीले जनाएको छ ।
खेतमा करेन्ट प्रवाह गर्ने विनोद उक्त घटनापछि सम्पर्कविहीन छन् ।
मृतक करिनाको शव परीक्षणका लागि बर्दिबास अस्पतालमा पठाएको छ ।
घटनाबारे अनुसन्धान शुरू भइसकेको प्रहरीले जनाएको छ ।
