१४ असार २०८३, आइतबार
सभापति रवि लामिछाने पक्राउको विरोधमा राष्ट्रिय स्वतन्त्र पार्टी (रास्वपा)ले सोमबार पनि पोखरामा प्रदर्शन गर्ने भएको छ ।
अदालतले लामिछानेलाई हिरासतमा राख्न ६ दिनको म्याद दिएपछि रास्वपाले प्रदर्शनलाई निरन्तरता दिन लागेको हो ।
उता प्रहरी हिरासतमा सोमबारबाट रविको बयान शुरू हुँदैछ । शुरूमा केन्द्रबाट आएको सीआईबीको टोलीले उनीसँग बयान लिनेछ ।
त्यसपछि बयानका लागि सरकारी वकिलको कार्यालय लगिने कास्की प्रहरीले जनाएको छ ।
सूर्यदर्शनलगायत सहकारीको पैसा गोरखा मिडियामा ल्याएर दुरूपयोग गरेको भन्दै संसदीय छानबिन विशेष समितिले रवि लामिछानेसहित ४ जनालाई कारबाही गर्न सिफारिश गरेको थियो ।
सोही प्रतिवेदन कार्यान्वयनका क्रममा रविलाई पक्राउ गरिएको हो । गोरखा मिडिया नेटवर्कका अर्का सदस्य छविलाल जोशी बञ्जाडे झण्डै एक महिनादेखि प्रहरी हिरासतमा छन् ।
लामिछानेले सहकारी ठगीमा आफूले संसदीय छानबिन समितिबाट ‘क्लीन चिट’ पाएको दाबी गर्दै आएका थिए ।
