नेपाल विद्युत् प्राधिकरणका प्रबन्ध निर्देशक कुलमान घिसिङले तोकिएको समयमा सरकारलाई स्पष्टीकरण बुझाएका छैनन् । समयसीमाको अन्तिम दिन बुधवार (कार्तिक ७ गते) पनि उनले स्पष्टीकरण नबुझाएका हुन् । 

स्पष्टीकरण बुझाउने अन्तिम दिन बुधवार घिसिङले दशैँ बिदाका कारण समयमा स्पष्टीकरण बुझाउन असमर्थ रहेको बताउँदै उर्जा, जलस्रोत तथा सिँचाइ मन्त्रालयलाई पत्र लेखेका छन् । जहाँ थप १५ दिनको समय माग गरिएको छ ।

प्रबन्ध निर्देशक घिसिङले दशैँ बिदाका कारण कर्मचारीहरू नभएकाले आवश्यक विवरण उपलब्ध नभएको उल्लेख गर्दै १५ दिनको समय माग गरेको पत्र पठाएको मन्त्रालय स्रोतले जनाएको छ ।  

‘मन्त्रालयले माग गरेका सबै विवरण उपलब्ध गराउन समय माग गरिएको पत्र मन्त्रालयमा आएको छ’, स्रोतले भन्यो, ‘जहाँ दशैँ बिदाका कारणले कर्मचारीहरूबाट विवरण नआएको कुरा उल्लेख छ ।’

उर्जा मन्त्रालयले गत असोज २३ गते विद्युत् प्राधिकरणका प्रबन्ध निर्देशक घिसिङलाई १५ बुँदे स्पष्टीकरण सोधेको थियो । 

डेडिकेटेड र ट्रंकलाइन विवादमा आफूखुसी गरेको भन्दै मन्त्रालयले स्पष्टीकरण सोधेको हो । उक्त स्पष्टीकरण बुझाउने बुधवार अन्तिम दिन रहेको थियो ।