२० असार २०८३, शनिबार
एनसेल फाउन्डेसनले सामुदायिक विकासमा ठोस योगदान पुर्याउन १९ वटा सामाजिक परियोजनाका लागि अनुदान आवेदन खुला गरेको छ ।
एनसेलको १९औं वार्षिकोत्सवको अवसरमा घोषणा गरिएको ‘नाइन्टिन फर नाइन्टिन’ नामक यो विशेष पहलले स्थानीय स्तरमा दिगो विकास र समाजमा दीर्घकालीन प्रभाव पार्ने परियोजनाहरूलाई समर्थन गर्ने उद्देश्य राखेको छ ।
यस पहल अन्तर्गत ७ प्रदेशमा १९ वटा परियोजनाहरू छनोट गरिनेछन् र प्रत्येक परियोजनालाई रु. १० लाख अनुदान प्रदान गरिनेछ । कुल अनुदान रकम १ करोड ९० लाख रुपैयाँ हुनेछ ।
यो पहल एनसेलको सामुदायिक प्रतिबद्धताको निरन्तरता हो, जसले अघिल्लो वर्षको ‘एटिन फर एटिन’ पहलबाट प्रेरणा लिएको छ ।
‘एटिन फर एटिन’ अन्तर्गत परियोजनाहरूले देशका विभिन्न भागहरूमा सकारात्मक प्रभाव पार्दै, सामाजिक विकासका विभिन्न पहलहरू सञ्चालन गरेका थिए ।
यस वर्षको ‘नाइन्टिन फर नाइन्टिन’ पहलले पनि त्यस्तै परियोजनाहरूलाई प्राथमिकता दिनेछ, जसले विशेषगरी स्वास्थ्य, शिक्षा, वातावरण संरक्षण, विपद् तयारी तथा प्रतिकार्य, र जीविकोपार्जनमा दीर्घकालीन फाइदा पुर्याउन सक्छन् ।
एनसेल फाउन्डेसनले यस अनुदानका लागि देशभरका गैर-नाफामूलक स्थानिय संघसंस्थाहरूलाई आवेदन दिन आमन्त्रण गरेको छ ।
यसका लागि उनीहरूले आफू कार्यरत क्षेत्रमा देखिएका चुनौतीहरू पहिचान गरी तिनलाई समाधान गर्न सक्ने परियोजना प्रस्ताव पेश गर्नुपर्नेछ ।
परियोजना चयनका लागि स्पष्ट उद्देश्य, सामुदायिक सहभागिता, र परियोजनाबाट दीर्घकालीन प्रभाव विस्तार हुने सम्भावनाहरूलाई प्राथमिकता दिइने फाउन्डेसनले जनाएको छ ।
एनसेल फाउन्डेसनकी कर्पोरेट कम्युनिकेसन र सीएसआर प्रमुख विशाखा लक्ष्मी खड्काले भनिन्, 'हामी एनसेल फाउन्डेसनमा अर्थपूर्ण परियोजनाहरू मार्फत समुदायको विकास र परिवर्तनमा विश्वास गर्दछौं । यस वर्षको ‘नाइन्टिन फर नाइन्टिन’ पहलले हामीलाई हाम्रा समुदायहरूलाई अझ सशक्त बनाउन अवसर दिनेछ । हामी देशभरका संघसंस्थाहरूलाई यस अवसरको फाइदा लिन आवेदन दिन प्रोत्साहित गर्दछौं ।'
यो पहलले स्थानीय तहमा सामाजिक विकासका परियोजनाहरूलाई मात्र प्रोत्साहन गर्ने छैन, बरु दिगो विकासका लक्ष्यहरू हासिल गर्न सहयोग पुर्याउने ठूला प्रभावहरू निम्त्याउनेछ ।
परियोजना कार्यान्वयनका क्रममा स्थानीय समुदायको सक्रिय सहभागिता हुने र यसले दीर्घकालीन परिवर्तन ल्याउने विश्वास गरिएको छ।
फाउन्डेसनका अनुसार परियोजना छनौट गर्दा परियोजनाहरूको स्पष्ट योजना, सामुदायिक आवश्यकता, र परियोजनाबाट दीर्घकालीन प्रभाव पर्ने सम्भावनाहरूलाई ध्यान दिइनेछ ।
यसले स्थानीय समुदायहरूलाई प्रत्यक्ष रूपमा सशक्त बनाउन योगदान गर्नेछ र समाजका वास्तविक चुनौतीहरू समाधान गर्न सहयोग पुर्याउनेछ ।
गतवर्षको ‘एटिन फर एटिन’ कार्यक्रमले देशभरि विभिन्न परियोजनाहरू सञ्चालन गर्न महत्वपूर्ण भूमिका खेलेको थियो ।
यस वर्षको ‘नाइन्टिन फर नाइन्टिन’ पनि त्यस्तै प्रभावकारी परियोजनाहरूलाई कार्यान्वयन गर्न समर्पित छ। यसले स्वास्थ्य, शिक्षा, वातावरण, विपद् तयारी, र जीविकोपार्जन जस्ता प्रमुख क्षेत्रहरूमा काम गर्ने संस्थाहरूलाई सशक्त पार्ने लक्ष्य राखेको छ ।
अनुदान प्राप्त गर्न इच्छुक योग्य संघसंस्थाहरूले एनसेल फाउन्डेसनको वेबसाइटमा गएर आवेदन दिन सक्नेछन् ।
