भारत सरकारको सहयोगमा स्याङ्जाको गल्याङ नगरपालिकास्थित गल्याङ नगर अस्पतालको भवन निर्माण सम्पन्न भएको छ । ‘नेपाल–भारत विकास सहकार्य’ अन्तर्गत भारत सरकारको ४.०१३ करोड रुपैयाँ आर्थिक सहयोगमा उक्त अस्पताल भवन निर्माण सम्पन्न भएको हो । 

उक्त नवनिर्मित भवनको शुक्रबार नेपालस्थित भारतीय राजदूतावासका प्रथम सचिव अविनाश कुमार सिंह, जिल्ला समन्वय समिति, स्याङ्जाका प्रमुख  श्रीप्रसाद जिटी र गल्याङ नगरपालिकाका नगर प्रमुख  गुरु प्रसाद भट्टराईले संयुक्त रुपमा उद्घाटन गरे । 

दूतावासका अनुसार भारत सरकार र नेपाल सरकारबीच भएको सम्झौता अन्तर्गत यो परियोजनालाई उच्च प्रभाव सामुदायिक विकास परियोजनाको रुपमा अघि बढाइएको थियो । यस्तै  जिल्ला समन्वय समिति, स्याङ्जामार्फत यो परियोजनाको कार्यान्वयन गरिएको थियो ।

उद्घाटन कार्यक्रममा जिल्ला समन्वय समितिका प्रमुख, गल्याङ नगरपालिकाका नगर प्रमुख, राजनीतिक प्रतिनिधि र अस्पताल व्यवस्थापनका प्रतिनिधिहरुले प्राथमिकताका क्षेत्रमा भारत सरकारले पुर्‍याउँदै आएको निरन्तर विकास सहयोगको प्रशंसा गरे । 

उक्त कार्यक्रममा राजनीतिक प्रतिनिधि, सरकारी अधिकारी, समाजसेवी, अस्पताल व्यवस्थापनका प्रतिनिधि, चिकित्सक, मेडिकल स्टाफ सदस्य  तथा गल्याङ नगर अस्पतालका अधिकारीको पनि उपस्थिति रहेको थियो ।