२२ जेठ २०८३, शुक्रबार
सप्तरीको हुनमाननगर कङ्कालिनी नगरपालिकाका शिक्षकहरूले तलबभत्ता नपाएको भन्दै विद्यालय बन्दगरी आन्दोलित भएपछि शिक्षण कार्य प्रभावित भएको छ ।
चाडपर्व आउँदासमेत काम गरेको तलब पाउन नसक्दा समस्या भएको भन्दै पालिकाका पाँच मावि र ३० वटा सामुदायिक विद्यालयका शिक्षकहरू आन्दोलित भएका हुन् ।
उनीहरूले तलबभत्ता नपाएको भन्दै आइतबारदेखि नगरपालिका कार्यालयको मुल गेटमा धर्ना दिएका हुन् ।
शिक्षकहरू विद्यालय बन्दगरी धर्नामा बस्दा करिब सात हजार आठ सय ७३ विद्यार्थी पठनपाठनबाट वञ्चित भएका छन् ।
नगरपालिकामा कार्यरत दुई सय २२ शिक्षक अहिले आन्दोलित भएका नगर कार्यालयले जनाएको छ । आन्दोलनका कारण नगरपालिकाभित्रका सबै विद्यालयको पठनपाठन प्रभावित बनेको छ ।
सङ्घर्ष समितिका संयोजक अशोक कुमार यादवले भने, 'चालु आर्थिक वर्षको साउनदेखि असोजसम्मको तलबभत्ता नपाउँदा समस्या भइरहेको छ । दशैं जसोतसो ऋण लिएर काट्यौँ, तिहारमा पनि तलब नपाए घरखर्च जुटाउन नै सास्ती हुनेछ ।'
यसअघि सङ्घर्ष समितिले कात्तिक ६ गते नगरप्रमुख विरेन्द्र माझीलाई तीन दिनको समयसीमा दिँदै शिक्षकले पाउनुपर्ने तलबभत्ता यथाशीघ्र निकासा गर्नेबारे ज्ञापनपत्र बुझाएको थियो ।
नगरप्रमुख माझीले केही विषयमा विवाद सृजना भई समयमा नगरसभा सम्पन्न हुन नसकेकाले समस्या भइरहेको बताए । उनले यथाशीघ्र समस्या समाधान गर्न आफू प्रयासरत रहेको उल्लेख गरे।
