२४ जेठ २०८३, आइतबार
राष्ट्रिय स्वतन्त्र पार्टीले आगामी मंसिर १६ गतेलाई तय भएको स्थानीय तहको उपनिर्वाचनका लागि नेताहरूको जिम्मेवारी तोकेको छ ।
बिहीबार केन्द्रीय निर्वाचन परिचालन समितिका संयोजक एवं केन्द्रीय सदस्य गणेश पराजुलीको अध्यक्षतामा बसेको बैठकले उपनिर्वाचनमा परिचालनका लागि सातै प्रदेशमा नेताहरूलाई जिम्मेवारी तोकेको हो ।
जसअनुसार कोशी प्रदेशमा केन्द्रीय सदस्य तथा सांसद निशा डाँगी, मधेशमा केन्द्रीय सदस्य तथा सांसद डा. चन्दा कार्की, बागमतीमा केन्द्रीय सदस्य तथा सांसद शिशिर खनाललाई जिम्मेवारी दिइएको छ ।
यसैगरी, गण्डकीमा केन्द्रीय सदस्य तथा सांसद विन्दवासिनी कांसकार, लुम्बिनीमा केन्द्रीय सदस्य कुसुम महर्जन, कर्णालीमा कोषाध्यक्ष लिमा अधिकारी र सुदूरपश्चिममा केन्द्रीय सदस्य विष्णु कुमार श्रेष्ठलाई निर्वाचन परिचालनको जिम्मेवारी दिइएको छ ।
केन्द्रीय निर्वाचन परिचालन समितिका संयोजक पराजुलीका अनुसार रास्वपाका तर्फबाट स्थानीय तह उपनिर्वाचनमा उठाइने उम्मेदवार चयन गर्न प्रारम्भिक निर्वाचन गरिने भएको छ । जसका लागि कार्यतालिका समेत सार्वजनिक गरिएको छ । संयोजक खनालका अनुसार प्रारम्भिक निर्वाचनका लागि कात्तिक २२ देखि २५ गतेसम्म दिउँसो २ बजेसम्म उम्मेदवारी दर्ता गर्न सकिने छ ।
प्रारम्भिक उम्मेदवारहरूको नामावली कात्तिक २५ गते राति ८ बजेसम्म प्रकाशन गरिने छ । कात्तिक २६ गते साँझ ५ बजेसम्म प्रारम्भिक उम्मेदवारीउपर दाबी विरोधको समय तोकिएको छ ।
संयोजक खनालका अनुसार कात्तिक २७ गते साँझ ५ बजेसम्म उम्मेदवारसँग छलफल गरिनेछ, कात्तिक २७ गते उम्दवारको अन्तिम नामावली प्रकाशन गरिनेछ, कात्तिक २८ गते साँझ ७ बजेसम्म मतदान/निर्णय गरिनेछ । प्रारम्भिक निर्वाचनको नतिजा कात्तिक २९ गते दिउँसो १ बजे प्रशासन गरिनेछ ।
