२९ जेठ २०८३, शुक्रबार
नेपाल विद्युत प्राधिकरणले विद्युत आपूर्ति रोकिएका २८ उद्योगमा लाइन जोड्ने निर्णय गरेको छ ।
मंगलबार बसेको प्राधिकरण सञ्चालक समितिको बैठकले कात्तिक ८ गते काटिएको लाइन जोड्ने निर्णय गरेको एक सदस्यले जानकारी दिए ।
गत आइतबार बसेको मन्त्रिपरिषद बैठकले प्राधिकरणलाई २४ घण्टाभित्र लाइन जोड्न निर्देशन दिने निर्णय गरेको थियो ।
त्यसपछि ऊर्जा मन्त्रालयमार्फत लाइन जोड्न दिइएको निर्देशनलाई आज बसेको सञ्चालक समिति बैठकले अनुमोदन गरेको हो ।
सञ्चालक समितिको बैठक सोमवारै बोलाइएको भएता पनि कोरम नपुगेर स्थगित भएको थियो ।
मंगलवार पनि दोस्रो पहलमा बैठक बसेको हो । सञ्चालक समितिको बहुमतले उद्योगमा लाइन जोड्ने निर्णय गरेको प्राधिकरण स्रोतको भनाइ छ ।
डेडिकेटेड र ट्रंकलाइन बक्यौता नतिरेको भन्दै गत कात्तिक ८ गते प्राधिकरणका प्रबन्ध निर्देशक कुलमान घिसिङको ठाडो आदेशमा उद्योगमा लाइन काटिएको थियो ।
