२२ जेठ २०८३, शुक्रबार
विसं २०८२ भित्र नेपाललाई सडक मानवमुक्त घोषणा गर्ने लक्ष्यका साथ मानव सेवा आश्रमले गत असोज २६ गतेबाट शुरू गरेको ‘मेची–महाकाली राष्ट्रिय उद्धार यात्रा अभियान–२०८१’ मङ्गलबार भक्तपुर आइपुगेको छ ।
यसवर्षको चाडपर्वमा कसैले बस्न नपरोस् सडकमा भन्ने नाराका साथ शुरू भएको अभियानको टोलीलाई भक्तपुरमा प्रमुख जिल्ला अधिकारी गोपालप्रसाद अर्यालको नेतृत्वको टोलीले स्वागत गरेको छ ।
मानव सेवा आश्रम र आनी छोयिङ डोल्मा फाउण्डेशनको संयुक्त आयोजना शुरू अभियानमा आजसम्म देशभरबाट एक सय ७३ जना पुरुष, ४९ जना महिला र नौ बालबालिकासहित कूल २३१ जनाको उद्धार गरिएको आश्रमका केन्द्रीय अध्यक्ष रामजी अधिकारीले बताए ।
संस्था स्थापना भएको १२ वर्षमा पुरुष छ हजार छ सय ३७, महिला चार हजार ८२ गरी १० हजार सात सय २२ जनाको उद्धार गरिएको छ । साथै दुई हजार तीन सय ३६ पुरुष र एक हजार आठ सय ६५ महिला गरी कूल चार हजार दुई सय एक जनाको पारिवारिक पुनःमिलन गराएको उल्लेख गर्दै अध्यक्ष रामजी अधिकारीले आश्रममा हाल एक हजार एक सय २१ पुरुष र सात सय ६९ महिला गरी कूल एक हजार आठ सय ९० जना आश्रित रहेको बताए । आश्रमले २७ जना भारतीय नागरिकलाई उद्धार गरी भारतमै पारिवारिक पुनःमिलन गराउन सफल भएको छ ।
अभियानमा सात प्रदेशमध्येबाट कोशीबाट ४४ जना, मधेसबाट ४० जना, बागमतीबाट ५२ जना, गण्डकीबाट ३५, लुम्बिनीबाट ४९ जना, कर्णालीबाट तीन जना र सुदूरपश्चिमबाट आठ जनाको उद्धार गरिएको भन्दै उनले भक्तपर र ललितपुरमा अझै उद्धार जारी रहेको बताए ।
अभियानलाई आगामी मङ्सिर २ सम्पन्न गरी ३ गते प्रधानमन्त्री केपी शर्मा ओलीबाट अभियानको समापन गरिने बताउँदै उनले देशलाई सडक मानवमुक्त बनाउन जिल्ला र प्रदेश प्रदेशले घोषणा गर्न स्थानीय तह र प्रदेश सरकारले भूमिका निर्वाह गर्न आग्रह गरे ।
राज्यका तीन तहकै सरकारले सहकार्य गर्ने, जिल्ला जिल्लामा हातेमालो गर्ने, सडकमा सडक मानव देखिने वित्तिकै अश्रमलाई खबर गरेर उद्धार गर्ने र सबै निकायबाट सकारात्मक सहयोग प्राप्त हँदा ०८२ मा नेपाललाई सडक मानवमुक्त बनाउन सकिने उनले बताए ।
भक्तपुरका प्रमुख जिल्ला अधिकारी अर्यालले राज्यका सबै निकायले अभिभावकत्व ग्रहण गर्नुपर्ने बताउँदै भक्तपुरलाई सडक मानवमुक्त बनाउन आफ्नो तर्फबाट सम्पूर्ण सहयोग गर्ने बताए ।
