काठमाडौंको गोकर्णेश्वर नगरपालिका–३, गाम्छामा एकै परिवारका तीन जनाको शव सडेगलेको अवस्थामा फेला परेको छ । प्रहरीको काठमाडौं उपत्यका अपराध अनुसन्धान कार्यालय, टेकुका अनुसार प्रारम्भिक जाँचबुझ गर्दा उनीहरूको निसास्सिएर मृत्यु भएको अनुमान छ । 

घटनास्थलमा त्रिवि शिक्षण अस्पतालका चिकित्सकहरूले स्थालगत जाँच गरेका थिए । प्रहरीका अनुसार कोठाको बीच भागतिर माकल बालेर आगो तापेको देखिएको र नजिकै तेलको बट्टा पनि भेटिएको छ । 

दुई महिनाको बच्चालाई तेल घस्न माकल बालेको र उनीहरू निन्द्रामा निसास्सिएर मृत्यु भएको हुनुक्ने प्रहरीले अनुमान गरेको छ । अनुसन्धान कार्यालयका एक उच्च अधिकृतले लोकान्तरसँग भने,‘सानो काखे बच्चालाई तेल लगाइदिने क्रममा माकलमा आगो बालेको र कोठमा भेन्टिलेटर समेत नभएकाले निसास्सिएर मृत्यु भएको हो कि भन्ने आशंका छ ।’ उनले शवको पोष्टमार्टम भएपछि मात्रै थप नयाँ तथ्य आउने जानकारी दिए ।

कान्छा नगरकोटीले श्रीमती र दुई छोराछोरी हराएको भन्दै प्रहरीलाई खबर गरेपछि प्रहरी वृत्त, बौद्ध र जिल्ला प्रहरी परिसर, काठमाडौंले खोजी गर्दा बिहीबार उनीहरू मृत फेला परेको जिल्ला प्रहरी परिसर काठमाडौंका प्रवक्ता, एसपी नवराज अधिकारीले जानकारी दिए । 

घरको बन्द कोठाभित्र ३३ वर्षीया सीता मोक्तान, उनकी छोरी अंशु मोक्तान र दुई महिनाका छोराको शव भेटिएको थियो । प्रहरीले सोधपुछ गर्दा कान्छाले घर बाहिर ताला लगाएकाले आफू बाहिरै बसेको र श्रीमतीलाई सम्पर्क गर्दा फोन नउठाएपछि खोजीका लागि प्रहरीमा निवेदन दिएको बताएका छन् । 

उनले शुरूमा श्रीमती आफन्तको घरमा गएको ठानेका थिए । तर, आफन्तकोमा पनि नभएको र फोन पनि नउठेपछि उनले खोजीका लागि प्रहरीमा निवेदन दिएका थिए । 

कान्छा कात्तिक १६ गतेदेखि घर बाहिरै बसेका थिए । प्रहरीले कान्छासँग थप सोधपुछ गरिरहेको जानकारी एसपी अधिकारीले दिए ।