०९ असार २०८३, मंगलबार
प्रहरीले ठगी सम्बन्धी मुद्दाका एक जना फरार प्रतिवादीलाई पक्राउ गरेको छ ।
पक्राउ पर्नेमा गोरखाको शहिद लखन गाउँपालिका-१ का घर भई हाल काठमाडौं महानगरपालिक-२ मा बस्दै आएका ४८ वर्षीय गोपाल थापा रहेका छन् ।
थापाले जग्गाधनीलाई बैंकमा ९५ लाख रूपैयाँ जम्मा गरिदिएको भन्ने नक्कली बैंक स्लिप (भौचर) समेत देखाएर ठगी गरेको भन्दै प्रहरीले उनलाई पक्राउ गरेको हो । थापाविरुद्ध काठमाडौं जिल्ला अदालतले पक्राउ पुर्जी जारी गरेको थियो ।
थापाले रकम जम्मा गरेको नक्कली भौचर देखाएर काठमाडौं चन्द्रागिरि नगरपालिका-२ बाडभञ्ज्याङस्थित कित्ता नं. २४४ (क्षेत्रफल ०-५-२-२) र कित्ता नं. ४९९ (क्षेत्रफल ०-२-१-०) जग्गा राजीनामा पास गराएका थिए । तर, स्लिप नक्कली भएको पाइएपछि पीडितले प्रहरीमा उजुरी दिएका थिए ।
थापालाई बुधबार साँझ काठमाडौंको बबरमहलबाट पक्राउ गरिएको काठमाडौं उपत्यका अपराध अनुसन्धान कार्यालयले जनाएको छ ।
थापालाई ठगी सम्बन्धी कसूरमा आवश्यक अनुसन्धान तथा कानूनी कारबाहीका लागि जिल्ला प्रहरी परिसर, भद्रकाली पठाइएको अपराध अनुसन्धान कार्यालयले जनाएको छ ।
