‘राडार गन’बाट सवारीको तीव्र गति मापन गर्दा ट्राफिक प्रहरीको गम्भीर लापरवाही भेटिएको छ । शुक्रबार अपरान्ह ललितपुर महानगरपालिका–१५ चक्रपथ सडकस्थित बीएण्डबी अस्पताल नजिकै ट्राफिक प्रहरीले गरेको ‘स्पीड चेकिङ’ स्थलमा दुर्घटना हुँदा एक युवतीले ज्यान गुमाएकी छन् । 

ट्राफिक प्रहरीले मोटरसाइकल रोक्न खोज्दा भएको दुर्घटनामा मोटरसाइकल पछाडी बसेकी तनहुँ भीमादकी १६ वर्षीया स्नेहा बस्यालको मृत्यु भएको हो । प्रदेश–३–०२ ००५ प २६४२ नम्बरको आर–१५ यमाहा मोटरसाइकल अनियन्त्रित हुँदा बस्यालको मृत्यु भएको जिल्ला प्रहरी परिसर ललितपुरका प्रमुख, एसएसपी शेखर खनालले बताए। ​

पेप्सीकोला बस्दै आएकी बस्यालको उपचारका क्रममा ग्वार्कोस्थित बीएण्डबी अस्पतालमा मृत्यु भएको हो । मोटरसाइकल चालक कागेश्वरी मनोहरा नगरपालिका–४ घर भएका २८ वर्षीय प्रत्युस थापा गम्भीर घाइते छन् । उनको बीएण्डबी अस्पतालको आईसीयूमा  उपचार चलिरहेको छ । थापाको टाउकोमा गम्भीर चोट लागेको छ ।

ओभर स्पीडमा रहेको मोटरसाइकललाई ट्राफिकले रोक्न खोज्दा थापा र बस्याल सवार मोटरसाइकल सडकको रेलिङमा ठोक्किएको थियो । ट्राफिक प्रहरीका अनुसार चालकले मोटरसाइकल ९९ को स्पीडमा हाँकेका थिए । मोटरसाइकलको ठक्करबाट ट्राफिकका सहायक हवलदार जनक सिंह भाट पनि गम्भीर घाइते भएका छन् । उनको नेपाल प्रहरी अस्पतालमा उपचार हुँदैछ ।

गत साउनमा पनि यस्तै प्रकृतिको घटना भएको थियो । साउन ३१ गते भक्तपुरको गठ्ठाघरमा रुखको आडमा बसेर ट्राफिक प्रहरीले राडार गनमार्फत सवारीको गति मापन गरिहेका बेला दुर्घटना भएको थियो । बा ३९ प ८९४४ नम्बरको स्कुटरलाई बीच सडक रोक्न लगाएपछि अनियन्त्रित भएर स्कुटर सडकमा पल्टिएको थियो । पछाडीबाट आएको ना ६ ख २१७३ नम्बरको मालवाहक ट्रकले स्कुटरलाई ठक्कर थियो । तीब्र गतिको ट्रकले स्कुटरलाई सय मिटर भन्दा परसम्म लतारेर लगेको थियो । दुर्घटनामा चालक ओखलढुंगाका उत्तम कोइरालाको मृत्यु भएको थियो ।

ट्राफिक प्रहरीले चालकलाई सडक नियम सिकाउने भन्दा पनि राजश्वमूखी हुँदा दुर्घटना निम्तिने गरेको विज्ञहरू बताउँछन् । रिङरोडमा स्पीड गनमार्फत दैनिक ४ ठाउँमा ‘चेक प्वाइन्ट’ राखेको देखिन्छ । यी बाहेक राजश्व उठाउनकै लागि ट्राफिक प्रहरीले उपत्यकामा दैनिक ३५ देखि ४० स्थानमा चेक प्वाइन्ट राख्दै आएको छ । 

ट्राफिक प्रहरीका प्रवक्ता, एसएसपी उमा प्रसाद चतुर्वेदीका अनुसार शुक्रबारको घटनामा चालक थापाले ट्राफिकको ‘चेक प्वाइन्ट’ छलेर भागेका थिए । पुनः ‘युटर्न’ गरेर हिड्ने क्रममा उनी रेलिङमा ठोक्किएको एसएसपी चतुर्वेदीले बताए ।

‘सडकमा ट्राफिक उभिएन भने ट्राफिक खै भनेर सोध्छन् । ट्राफिकले इसारा एवं संकेत गरेर सवारी रोक्न खोज्यो भने चालक उम्किएर भाग्छन्, दुर्घटना निम्तिन्छ,’ चतुर्वेदीले लोकान्तरसँग भने,‘उपत्यकामा हुने गरेका अधिकांश दुर्घटना तीव्र गतिमा सवारी हाँक्दा भएको देखिन्छ । ट्राफिकले दुर्घटना न्यूनीकरणका लागि चेक प्वाइन्ट राख्दै आएको छ ।’

स्पीड राडार गन लिएर बस्ने ट्राफिक प्रहरी सिधा सडकमा नबसेर घुम्ती तथा मोड सकिने बित्तिकै भेटिने सडकमा बसेका हुन्छन् । तीव्र गतिमा हाँक्ने चालकलाई ‘पासो’ थापेर रोक्ने र चिट काट्ने प्रवृत्ति नरोकिँदासम्म दुर्घटना न्यूनीकरण नहुने बताउँछन्, पूर्वडीआईजी हेमन्त मल्ल ठकुरी ।

‘एकातिर नियम उल्लंघन गरेर ट्राफिक प्रहरीको आँखा छल्दै भाग्ने र अर्कोतिर धराप थापेको शैलीमा ट्राफिकले चेक प्वाइन्ट राख्नु दुवै जोखिमपूर्ण देखिन्छ’, पूर्वडीआईजी मल्ल ठकुरी भन्छन् ।

सामान्य सचेत मात्र गराउन सकिने घटनामा पनि जरिवाना तिराउने शैलीले सवारी चालक समेत ट्राफिक प्रहरीप्रति आक्रोशित हुने गरेको बुझाइ ठकुरीको छ । 

गएको एक वर्षमा ट्राफिक प्रहरीको जरिवानाबाट मात्रै १ अर्ब ७५ करोड राजश्व संकलन भएको छ । तर, त्यो रकम सडक बत्ती र सवारी दुर्घटना न्यूनीकरणमा प्रयोग भएको छैन । यसले सरकार राजश्व उठाउन मात्र केन्द्रित भएको दर्शाउँछ । 

पूर्वडीआईजी ठकुरी भन्छन्,‘नेपालमा जरिवाना कम हुँदा पनि नियम उल्लंघनको घटना बढेको छ भने ट्राफिक प्रहरीले पनि आफ्नो चेकिङ शैली फेर्नुपर्ने देखिन्छ ।’