१५ असार २०८३, सोमबार
वैदेशिक रोजगारीका लागि रोमानिया पठाइदिने भन्दै ठगी गरेको आरोपमा एक जना पक्राउ परेका छन् । पक्राउ पर्नेमा सुनसरीको इनरुवा नगरपालिका-६ का २९ वर्षीय सञ्जीव चौधरी रहेका छन् ।
उनलाई प्रहरीको काठमाडौं उपत्यका अपराध अनुसन्धान कार्यालयको टोलीले काठमाडौं महानगरपालिका-१२ सोल्टीमोडबाट पक्राउ गरेको हो ।
चौधरीले बेरोजगार युवायुवतीहरूलाई आकर्षक तलबको प्रलोभनमा पारी रोमानिया लैजाने भन्दै लामो समयसम्म झुक्यानमा राखेपश्चात विदेश नपठाई सम्पर्कविहीन भएका थिए ।
उनी सम्पर्कविहीन भएपछि पीडितले प्रहरीमा जाहेरी दिएका थिए । उनले तीन जना व्यक्तिबाट ६ लाख ५० हजार रूपैयाँ ठगी गरेको प्रहरीले जनाएको छ ।
पक्राउ परेका चौधरीलाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको अपराध अनुसन्धान कार्यालयका एसपी काजी कुमार आचार्यले जानकारी दिए ।
