०४ साउन २०८३, सोमबार
प्रहरीले सुनको सिक्री लुटपाटमा संलग्न रहेको आरोपमा काठमाडौंबाट दुई जनालाई पक्राउ गरेको छ ।
पक्राउ पर्नेमा धादिङको धुनिवेशी नगरपालिका-२ स्थायी घर भई काठमाडौंको नागार्जुन नगरपालिका-४ शरणपुर बस्ने ४२ वर्षीय गोरे तामाङ र काठमाडौं महानगरपालिका-१५, विजेश्वरीका बाबु भनिने ३९ वर्षीय कृष्ण प्रसाद श्रेष्ठ रहेका छन् ।
उनीहरूले नागार्जुन नगरपालिका-६ टौखेलकी ७२ वर्षीया मैया बुढाथोकीले घाँटीमा लगाएको २ तोलाको सुनको सिक्री लुटेको प्रहरीले जनाएको छ । बुढाथोकी घर नजिक बसेका बेला मोटरसाइकमा पुगेका उनीहरूले लुटपाट गरेका थिए ।
प्रहरीले पक्राउ परेकाहरूको साथबाट लुटिएको दुई तोलाको सुनको सिक्री र लुटपाटमा प्रयोग गरिएको बा ९६ प ५७१७ नम्बरको अपाचे मोटरसाइकल समेत बरामद गरेको छ ।
पक्राउ परेका दुवै जनालाई प्रहरी वृत्त स्वयम्भूको हिरासतमा राखेर थप अनुसन्धान भइरहेको जिल्ला प्रहरी परिसर काठमाडौंले जनाएको छ ।
