२० असार २०८३, शनिबार
नेकपा एमालेले पूर्व उपाध्यक्ष भीम रावललाई पार्टीबाट निष्काशन गरेको छ । बुधबार बसेको सचिवालय बैठकले रावललाई पार्टीबाट निष्काशन गर्ने निर्णय गरेको हो ।
यस्तै, बैठकले स्थायी समिति सदस्य विन्दा पाण्डे र केन्द्रीय सदस्य उषाकिरण तिमल्सेनालाई ६ महिनाका लागि निलम्बन गर्ने निर्णय गरेको उपमहासचिव प्रदीप ज्ञवालीले जानकारी दिए ।
उनीहरूले पार्टी अनुशासनविपरीत काम गरेको एमालेको निष्कर्ष छ । एमालेले यसअघि तीनै जनालाई स्पष्टीकरण सोधेको थियो । उनीहरूले बुझाएको स्पष्टीकरण चित्त नबुझेपछि पाण्डे र तिमल्सेनालाई ६ महिनाका लागि जिम्मेवारीबाट मुक्त गर्ने निर्णय गरिएको ज्ञवालीले बताए ।
नेता रावल पछिल्लो समय पार्टीमा लगभग जिम्मेवारीविहीन थिए । उनी एमालेको १०औं महाधिवेशनमा ओलीसँगै अध्यक्षमा भिडेका थिए । अध्यक्षमा पराजित भएका रावललाई त्यसपछि कुनै जिम्मेवारी दिइएको थिएन ।
रावलले निरन्तर पार्टी हितविपरित गतिविधि गरेपछि साधारण सदस्य समेत नरहनेगरी कारबाही गरिएको उपमहासचिव ज्ञवालीले बताए ।
एमालेले व्यवसायी मीनबहादुर गुरुङबाट जग्गा दानमा लिने निर्णयका विरुद्ध रावल, पाण्डे र तिमल्सेनासहितका नेताहरूले सार्वजनिक रूपमै बोलेका थिए ।
यस प्रकरणमा पाण्डे र तिमल्सेनाले बुझाएको स्पष्टीकरणमा आत्मालोचना समेत नगरेकाले निलम्बन गरिएको ज्ञवाली बताउँछन् ।
पछिल्लो समय रावल एमालेबाट विभाजन भएर बनेको एकीकृत समाजवादीमा जाने चर्चा चलिरहेको छ ।
