काठमाडौँमा जारी योनेक्स सनराईज नेपाल इन्टरनेशनल च्यालेन्ज २०२४ मा नेपालको यात्रा एक कांस्यमा सिमित हुँदै समाप्त भएको छ ।

आज सम्पन्न मिक्स युगल तर्फको सेमिफाइनलमा खेलमा नेपालका नम्बर एक खेलाडी द्वय प्रिन्स दाहाल र रसिला महर्जन थाइल्यान्डका नोन्ताकोर्न थोङ्ग अन र कोड्चापोर्न चाईछानाको जोडी सँग २१–१५, २१–१७ ले पराजित भए पश्चात् नेपाल एक कांस्यमा खुम्चिन गएको हो ।

यस अघि प्रिन्स र रसिलाको जोडीले क्वाटरफाइनलमा नेपालकै क्षितिज खनाल र शोभा गौचनको जोडीलाई पराजित गर्दै सेमिफाइनलमा स्थान बनाएका थिए ।

नेपाल ब्याडमिन्टन संघको आयोजनामा भएको च्याम्पियनसिपको मिकस युगलकै अर्को खेलमा मलेसियाका लाउ यि सेङ्ग र याप रु चेनको जोडीले फाइनलमा स्थान बनाए । उक्त जोडीले भारतका थानदाङ्ग्री हेमा नगेन्द्र बाबु र श्रीललिता सुप्रिया यलाप्रागाडाको जोडीलाई २१–१०, २१–९ले पराजित गरेका थिए ।

महिला एकल तर्फको खेलमा भारतकी इरा शर्माले जित हात पार्दै फाइनलमा थाइल्यान्डकी ललिनरात चाईवान संगको भेट पक्का गरिन् । ईराले सेमिफाइनलमा थाइल्यान्डकी तिदापोर्न क्लिबिसुनलाई १५–२१, २५–२३, २१–१५ र ललिनरातले युएसएकी इसिका जयसवाललाई २१–१४, २१–१७ ले पराजित गर्दै फाइनल यात्रा तय गरेका हुन् ।