हुम्लासहित कर्णालीका उच्च पहाडी र हिमाली क्षेत्रमा शुक्रबार रातिदेखि हिमपात भइरहेको छ । शुक्रबार दिउँसो बाक्लो बादल लागेका कारण रातिदेखि हिमपात भएको हो । 

शनिबार बिहान सदरमुकाम सिमकोटमा चार इञ्च हिउँ जमेको छ भने उत्तरी नाम्खा गाउँपालिकामा दुई फिटसम्म हिउँ परेको छ । हुम्लामा तेस्रो पटक हिमपात हुँदा किसानलाई राहत मिलेको स्थानीय गौगोरा बोहराले बताए । यतिबेला परेको हिउँले बालीको उत्पादन राम्रो हुने हुम्लाका किसानको भनाइ छ । 

यस्तै, सदरमुकाम सिमकोटसहित उत्तरी नाम्खा गाउँपालिकामा जनजीवन प्रभावित बनाएको छ । 

तापक्रम माइनसमा झरेको छ । यस्तै अन्तर जिल्ला जोड्ने एकमात्रै हवाई सेवा अवरुद्ध भएको छ । हिमपात भइरहेकाले हवाई सेवा अवरुद्ध भएको हो ।