देश दौडाहमा रहेका नेकपा (एमाले)लेबाट निष्कासित नेता डा. भीम रावलले सुनसरीमा विभिन्न पार्टीबाट असन्तुष्ट नेताहरूसँग भेटघाट गरेका छन् ।

अन्तर्राष्ट्रिय आमन्त्रण भरौल भेट्रान गोल्डकपको उद्‌घाटन गर्न सुनसरी पुगेका नेता रावलले शनिबार साँझ नेकपा एमालेलगायत अन्य पार्टीबाट असन्तुष्टहरूलाई भेटेका हुन् ।

बराह क्षेत्रको एक होटलमा भएको भेटघाटमा अधिकांश एमालेबाट असन्तुष्टहरू देखिएका कार्यक्रम सहभागी नेकपा एकीकृत समाजवादीका सुनसरीका सचिवालय सदस्य गोकुल थापाले जानकारी दिए । ‘धेरै एमालेका असन्तुष्टहरू थिए,’ उनले भने ‘झापादेखि पनि केही व्यक्ति आएका थिए ।’

उनले उद्‌घाटन गर्ने भनेको फूटबल प्रतियोगिता एमालेको दबाबमा रोकिएको स्रोतको दाबी  छ ।

‘एमालेले कारबाही गर्नुभन्दा अगाडि नै उहाँलाई प्रमुख अतिथि बनाएका थियौं,’ क्लबका एक पदाधिकारीले भने, ‘तर एमालेको दबाब भएपछि कार्यक्रम रोकेका हौ ।’

प्रतियोगिता २२ पुससम्मका लागि सरेको क्लबले जनाएको छ ।​

प्रतियोगिता स्थगित भएपछि आयोजक क्लबका पदाधिकारी विमल कार्कीलगायतले रावललाई होटलमा लगेका थिए । कार्की पनि असन्तुष्ट एमाले हुन् ।

उहिलेको एमाले अहिले रंग खुइलिएर बामालेमा परिणत भयो : रावल