नेपाली कांग्रेसले संसदीय दलको अनुशासन समितिको संयोजक दिलेन्द्रप्रसाद बडूलाई दिएको छ ।

बिहीबार बसेको पदाधिकारी र संसदीय दल कार्यसमितिको बैठकपछि कांग्रेसले संसदीय दलको अनुशासनको समितिको संयोजकमा बडूलाई चयन गरेको हो ।

‘नेपाली कांग्रेस संसदीय दलको विधानको धारा २० बमोजिम अनुशासन समिति गठनका लगि प्रतिनिधिसभा सदस्य माननीय दिलेन्द्रप्रसाद बडूलाई संयोजक चयन गर्ने निर्णय गर्दछ,’ बैठकपछिको निर्णयमा उल्लेख छ ।

बैठकले प्रतिनिधिसभा अन्तर्गतका तीन समितिका लागि पनि संयोजक तोकेको छ ।

जसमा प्रतिनिधिसभा अन्तर्गतका अर्थ समितिका लागि डा. प्रकाशशरण महत, सार्वजनिक लेखा समितिका लागि सञ्जयकुमार गौतम र कृषि, सहकारी तथा प्राकृतिक स्रोत समितिका लागि चन्दा चौधरी छन् ।

उनीहरूलाई संयोजक तोक्ने प्रस्ताव बैठकबाट अनुमोदनसमेत भइसकेको छ ।