बलिउड अभिनेता सैफ अलि खानले हालसालै ज्यानमारा आक्रमण भोगेका छन्। यो आक्रमणबाट स्वास्थ्यलाभ गर्न नपाउँदै उनलाई अर्को ठूलो झट्का दिने खबर आएको छ। 

सैफको पटौदी परिवारको पुस्तैनी सम्पत्ति चाँडै नै केन्द्र सरकारको नियन्त्रणमा जान सक्ने सम्भावना रहेको छ।

यी सम्पत्तिहरू मध्यप्रदेशको भोपालमा रहेका छन् र तिनको अनुमानित मूल्य १५ हजार करोड भारतीय रूपैयाँ रहेको बताइएको छ। मध्यप्रदेश उच्च अदालतले यी सम्पत्तिहरूमाथिको स्थगन आदेश हटाएको छ।

अभिनेता सैफ अलि खान हालैको ज्यानमारा आक्रमणको कारण अस्पताल भर्ना भएका थिए। अस्पतालबाट उनी मंगलबार मात्र घर फर्किएका छन्। 

यसैबीच, मध्यप्रदेश उच्च अदालतबाट उनका लागि नराम्रो खबर आएको छ। सैफ अलि खानको पटौदी परिवारको भोपाल र रायसेनस्थित पुस्तैनी सम्पत्तिहरूलाई केन्द्र सरकारले आफ्नो नियन्त्रणमा लिन सक्ने सम्भावना छ। 

यी सम्पत्तिहरूमाथि लागेको स्थगन आदेश उच्च अदालतले हटाएको छ। यसपछि शत्रु सम्पत्ति अधिनियम, १९६८ अन्तर्गत ती सम्पत्तिहरू केन्द्र सरकारले अधिग्रहण गर्न सक्नेछ।

शत्रु सम्पत्ति भनेको के हो?
केन्द्र सरकारले सैफ अलि खानको भोपालस्थित सम्पत्तिलाई शत्रु सम्पत्ति अधिनियम-१९६८ अन्तर्गत जफत गर्न सक्छ। यहाँ यो बुझ्न आवश्यक छ कि शत्रु सम्पत्ति भनेको के हो?

शत्रु सम्पत्ति अधिनियम अन्तर्गत भारत सरकारले ती व्यक्तिहरूको सम्पत्तिहरूमा दाबी गर्न सक्छ, जो सन् १९४७ को विभाजनपछि पाकिस्तान गए। सैफ अलि खानको पटौदी परिवारको भोपालस्थित सम्पत्ति पनि यही श्रेणीमा पर्ने गर्दछ।