१२ साउन २०८३, मंगलबार
प्रधानमन्त्री केपी शर्मा ओलीले बजारमा चर्चा कमाइरहेको ‘म त ढलें–ढलें ..’ गीतलाई उद्धृत गर्दै सरकार नढल्ने दाबी गरेका छन् ।
शुक्रवार प्रतिनिधि सभा बैठकमा सम्बोधनका क्रममा ओलीले सरकारको भविष्यलाई लिएर अनेक थरी हल्ला गरिएको टिप्पणी गरेका हुन् ।
प्रमुख प्रतिपक्षी दल नेकपा (माओवादी केन्द्र)का अध्यक्ष पुष्पकमल दाहाल प्रचण्डको भनाइप्रति कटाक्ष गर्दै ओलीले भने– 'विपक्षमा रहेका साथीहरूले एउटा कुरामा आफ्नो समय व्यर्थै खेर फालेजस्तो लागिरहेको छ– ‘सरकार ढल्छ । ढल्नै लाग्यो । पुस मसान्त, माघे संक्रान्ति काट्दैन । आदि इत्यादि । ‘ढलें–ढलें, ढलें–ढलें म त...’ यो ‘गीत’ अति नै गाइयो । यो ‘गीत’ मनोरञ्जन पार्टी/उत्सवहरूमा सुहाउला, राजनीतिमा सुहाउँदैन ।'
प्रचण्डले सरकार लामो नजाने बताउँदै आएका छन् ।
ओलीको प्रचण्डको नाम नलिई कतिपयले पुस मसान्त, माघे सङ्क्रान्ति लगायतका भाका राख्दै आएको टिप्पणी गरे ।
ओलीले गीतको सहारा लिएर सरकार नढल्ने दाबी गरिरहँदा कांग्रेस सभापति शेरबहादुर देउवा मुस्कुराइरहेका देखिन्थे ।
ओलीले कुनै दल टुक्राउने अध्यादेश ल्याउने 'मेनु' सरकारको सूचीमा नरहेको दाबी गरे ।
उनले आफूले सरकारको नेतृत्व लिएको ६ महिनामा आर्थिक सूचकहरू सकारात्मक बनेको दाबी समेत गरे ।
