२२ असार २०८३, सोमबार
वैदेशिक रोजगारका लागि विभिन्न देश पठाउने भन्दै ठगी गरेको आरोपमा प्रहरीले तीन जनालाई पक्राउ गरेको छ ।
प्रहरीको काठमाडौं उपत्यका अपराध अनुसन्धान कार्यालयले उनीहरूलाई काठमाडौं उपत्यकाका विभिन्न स्थानबाट पक्राउ गरेको हो ।
पक्राउ पर्नेमा सुर्खेतको गुर्भाकोट नगरपालिका-२ घर भई काठमाडौंको तार्केश्वर नगरपालिका नेपालटार बस्ने ३६ वर्षीय रमेश कुमार डीसी, रोल्पाको गंगादेव गाउँपालिका-५ घर भई काठमाडौं महानगरपालिका-३१ बस्ने ४१ वर्षीय जै बहादुर वली र मकवानपुरको थाहा नगरपालिका-२ घर भई काठमाडौं महानगरपालिका-२६ बस्ने ३८ वर्षीय रविन कार्की रहेका छन् ।
डीसीले सिंगापुर पठाउने भन्दै एक जनाबाट १० लाख, वलीले क्रोएसिया पठाउने भन्दै एक जनाबाट ६ लाख र कार्कीले स्लोभाकिया पठाउने भन्दै एक जनाबाट १० लाख ठगी गरेको प्रहरीले जनाएको छ ।
डीसी र वलीलाई बिहीबार र कार्कीलाई बुधबार पक्राउ गरिएको अपराध अनुसन्धान कार्यालयका सूचना अधिकारी, एसपी काजी कुमार आचार्यले जानकारी दिए ।
पक्राउ परेकामध्ये डीसी र वलीलाई वैदेशिक रोजगार विभाग ताहाचल तथा कार्कीलाई प्रहरी वृत्त बौद्ध पठाएको एसपी आचार्यले बताए ।
कार्कीविरुद्ध प्रहरी वृत्त बौद्धमा समेत बैंकिङ कसुर सम्बन्धी २ वटा मुद्दामा ११ लाख ५० हजार बिगो कायम गरेर जाहेरी परेकाले उनलाई त्यहाँ पठाइएको हो ।
उनीहरूले बेरोजगार युवायुवतीहरूलाई आकर्षक तलबको प्रलोभनमा पारी विदेश लैजाने भन्दै रकम असुलेका प्रहरीले जनाएको छ ।
लामो समयसम्म झुक्यानमा राखेपश्चात विदेश नपठाई सम्पर्कविहीन भएपछि पीडितहरूले प्रहरीमा जाहेरी दिएका थिए । पीडितहरूको जाहेरीपछि उनीहरूलाई पक्राउ गरिएको प्रहरीले जनाएको छ ।
