०६ साउन २०८३, बुधबार
रुसी राष्ट्रपति भ्लादिमिर पुटिनले अमेरिकासँगको वार्ताअघि आफ्नो स्पष्ट अडान दोहोर्याएका छन् । उनले युक्रेनबाट कब्जा गरिएको भूभाग रुसकै हुनुपर्ने अडान दोहोर्याएका हुन् ।
अमेरिका र रुसबीच साउदी अरेबियामा उच्चस्तरीय वार्ता हुने तयारी छ । उक्त वार्तामा अमेरिकी राष्ट्रपति डोनाल्ड ट्रम्पको प्रशासनले युक्रेन युद्ध समाधानका लागि प्रस्ताव ल्याउने बताइएको छ ।
क्रेमलिनका प्रवक्ता दिमित्री पेस्कोभका अनुसार विदेशमन्त्री सेर्गेई लाभरोभ र राष्ट्रपति पुटिनका शीर्ष विदेश नीति सल्लाहकार युरी उशाकोभ वार्ताका लागि साउदी अरेबिया जाँदै छन् ।
वार्तामा ट्रम्प प्रशासनका अधिकारीहरू पनि सहभागी हुनेछन् । यस छलफलले आगामी पुटिन-ट्रम्प बैठकको आधार तय गर्नेछ ।
गत हप्ता पुटिन र ट्रम्पबीच ९० मिनेट लामो फोन वार्ता भएको थियो, जसमा युक्रेन युद्ध अन्त्य गर्ने उपायबारे कुराकानी भएको बताइएको छ ।
ट्रम्पले युद्ध चाँडै अन्त्य गर्ने चाहना व्यक्त गरेका छन् । उनका सहयोगीहरूले अप्रिलभित्रै युद्धविराम गराउने योजना बनाइरहेको अन्तर्राष्ट्रिय सञ्चारमाध्यमले जनाएका छन् ।
तर, मस्कोले अस्थायी युद्धविरामलाई पर्याप्त नठानी स्थायी समाधान खोज्नुपर्ने अडान राख्दै आएको छ । रुसले युक्रेनलाई स्थायी रूपमा तटस्थ रहनुपर्ने, सैन्य गतिविधि सीमित गर्नुपर्ने र हालको भू-राजनीतिक अवस्था स्वीकार्नुपर्ने सर्त अघि सारेको छ ।
पुटिन प्रशासनले कब्जा गरिएका क्षेत्रहरू रुसकै अंग हुनुपर्ने कुरामा कुनै सम्झौता नहुने स्पष्ट पारेको छ ।
