सांसदहरूले भारतको उडिसामा नेपाली विद्यार्थी प्रकृति लम्सालको रहस्यमय मृत्यु भएपछि नेपाली विद्यार्थीमाथि अमानवीय व्यवहार भएको भन्दै आपत्ति जनाएका छन् । 

मंगलबार बसेको प्रतिनिधिसभा बैठकको आकस्मिक समयमा सांसदहरूले अभद्र व्यवहारको भर्त्सना गर्दै घटनाको सत्य-तथ्य छानबिनका लागि सरकारसँग माग गरेका हुन् । 

‘भारतमा नेपाली विद्यार्थीको रहस्यमय मृत्यु भएपछि सिंगो नेपाल तरंगित भएको छ । यस विषयमा, गृहमन्त्रीले सरकारले गरेका कामबारे जानकारी गराउनुभयो । मृतकको मृत्युपछि छानबिन एउटा विषय हो,’ एमाले सांसद ठाकुर गैरेले भने, ‘तर अहिलेसम्म आएका भिडियो र सन्दर्भले हिजोदेखि विद्यार्थीमाथि भएको अभद्र व्यवहार र प्रशासनकद्वारा नेपाली विद्यार्थीमाथि गरिएको अभद्र व्यवहार भाषा, शब्दावली सुन्दा लज्जा बोध हुन्छ । नेपाल र नेपालीप्रति भारतीय व्यक्तिबाट भएको शब्द, व्यवहारप्रति दुःख व्यक्त गर्छु ।’

न्यूनतम् व्यवहारसमेत नभएको भन्दै उनले नेपाल र नेपालीका लागि सह्य नहुने बताए ।

त्यस्तै राष्ट्रिय स्वतन्त्र पार्टीका सांसद मनीष झाले भारतमा चौकीदारले नेपाली  विद्यार्थी पिट्न पाएको भन्दै सरकारले अग्रसरता नलिएको भन्दै प्रश्न उठाए । 

‘छिमेकमा कलेजको चौकीदारले हाम्रो विद्यार्थीलाई सजिलै पिट्न पाए । कलेजको चौकीदारले तिमीहरूको  देशको बजेट हाम्रो कलेज जति पनि छैन भनेर हेप्न पाए,’ झाले भने, ‘दुई तिहाइको दम्भ यता छ, तर देशबाहिर कही छैन । आत्मसम्मान, सुरक्षा छिमेकमा छैन । दुईतिहाइको सरकारले के गर्दैछ । २२ लाख नेपाली भारतमा पेशा र रोजगारीको लागि हुनुहुन्छ । २० हजार बढी विद्यार्थी युनिभर्सिटीमा हुनुहुन्छ ।’

यसैले कूटनीतिक तहको संरचना नै बदल्नुपर्ने उनको भनाइ छ । दूतावासका १६ जना कर्मचारीले सबैतिर हेर्न नसकेको उनले बताए ।

बैठकमा नेकपा माओवादी केन्द्रका सांसद माधव सापकोटाले भारतको उडिसामा नेपाली विद्यार्थीको शङ्कास्पद मृत्युपछि सरकारले कूटनीतिक अक्षमता देखाएको आरोप लगाए । सापकोटाले लम्सालको मृत्युपछि विद्यार्थीले दुःख पाउँदा पनि सरकारले कूटनीतिक सक्षमता नदेखाएको आरोप लगाएका हुन् । 

‘भारतको उडिसामा नेपाली विद्यार्थी प्रकृति लम्सालको रहस्यमय मृत्यु भयो । अमानवीय व्यवहार नेपालीमाथि धावा बोलियो,’ सापकोटाले भने, ‘तर घटनापछि सरकारले कूटनीतिक सक्षमता देखाएन । त्यसकारण पनि अरु विद्यार्थीले सास्ती भोग्नुपरेको छ ।’

सापकोटाले माओवादी पार्टीको तर्फबाट घटनाको भर्त्सना गरेको उनले बताए । यसतर्फ सरकारको ध्यानाकर्षण गराउँदै उनले मृतक परिवारलाई न्याय दिन माग गरेका छन् ।