१२ साउन २०८३, मंगलबार
नेपाली कांग्रेसका सभापति एवं पूर्व प्रधानमन्त्री शेरबहादुर देउवाले बिहीबारदेखि गर्ने भनिएको भारत भ्रमण अन्तिम समयमा आएर स्थगित भएको छ ।
कांग्रेस केन्द्रीय कार्यालयका मुख्यसचिव कृष्णप्रसाद पौडेलले सभापतिले भारत भ्रमण गर्ने कार्यक्रम अन्तिम समयमा स्थगित भएको जानकारी दिए ।
देउवा प्रयागराजमा चलिरहेको महाकुम्भ मेलामा दर्शन गरेर उत्तर प्रदेशमा आयोजित एक औपचारिक कार्यक्रममा सहभागी हुने तय भएको थियो । भ्रमण किन स्थगित भएको भन्नेबारे पौडेलले खुलाउन चाहेनन् ।
स्रोतका अनुसार दिल्लीमा उच्चस्तरीय राजनीतिक भेटवार्ताको सम्भावना नरहेपछि देउवाले भारत भ्रमण स्थगित गरेका हुन् । शुरूमा २ दिनको भ्रमण भनिए पनि प्रयागराजको कार्यक्रम सकिएपछि देउवा उतैबाट दिल्ली जाने तयारी थियो ।
स्रोतका अनुसार देउवाले भारतीय प्रधानमन्त्री नरेन्द्र मोदी, विदेश मन्त्री डा. एस जयशंकर र राष्ट्रिय सुरक्षा सल्लाहकार अजित डोभाललाई भेट्न इच्छा व्यक्त गरेका थिए ।
व्यस्त शेड्युल देखाएर तीनैजनाले देउवालाई भेट्न इन्कार गरेको स्रोतको दाबी छ ।
दिल्लीमा उच्चस्तरीय भेटवार्ताको सम्भावना नरहेपछि देउवाले भ्रमण स्थगित गरेको स्रोतले बतायो ।
दुई महिनाअगाडि परराष्ट्र मन्त्री डा. आरजू राणा देउवाले नयाँ दिल्ली भ्रमणका बेला अथक प्रयास गरे पनि उच्चस्तरीय राजनीतिक भेटवार्ता गर्न पाएकी थिइनन् ।
२०८१ असार ३१ गते कांग्रेस र एमाले मिलेर केपी ओलीको नेतृत्वमा नयाँ सरकार गठन भएपछि दुई देशका सरकारबीचको सम्बन्ध सौहार्द बन्न सकेको छैन ।
सरकार गठनको ७ महिना बितिसक्दा दुई देशबाट उच्चस्तरीय राजनीतिक भ्रमण भएको छैन ।
प्रधानमन्त्री ओलीले मंसिर १७ गतेदेखि चीन भ्रमण गरेर बीआरआईसम्बन्धी केही सम्झौता गरेका थिए ।
चीनबाट फर्किने क्रममा विमानस्थलमै ओलीले छिट्टै भारत भ्रमण हुने बताएका थिए । तर, भारतले अहिलेसम्म प्रधानमन्त्रीलाई भ्रमणको निम्ता दिएको छैन ।
भारतसँगको सम्बन्ध सुधारका लागि सत्ता गठबन्धनका नेताहरूले कोशिश गरिरहेका छन् ।
यही पृष्ठभूमिमा ‘वेटिङ प्राइमिनिस्टर’ देउवाले तीर्थाटनका साथसाथै नयाँ दिल्लीमा भेटवार्ता गर्ने चाहना राखेका थिए । यसका लागि कांग्रेसका नेताहरूले पहल गरेका थिए ।
भारतीय संस्थापनले देउवासँग भेटका लागि ‘ग्रीन सिग्नल’ नदिएपछि भ्रमण स्थगित हुन पुगेको हो ।
इन्डिया फाउन्डेसनले आयोजना गरेको ‘कुम्भ ग्लोबल समिट अन डेभलपमेन्ट एन्ड सस्टेनेबिलिटी’ कार्यक्रममा देउवालाई नेपालका पूर्व प्रधानमन्त्रीको हैसियतमा वक्ताका रूपमा आमन्त्रण गरिएको थियो ।
पढ्नुहोस्, यो पनि :
‘बाध्यताले बीआरआईमा हस्ताक्षर भयो, कांग्रेस नमानेको भए एमाले–माओवादी मिल्थे’
