कर्णाली प्रदेशको राजधानीसमेत रहेको वीरेन्द्रनगर नगरपालिकालाई हरित नगरको रूपमा विकास गरिँदै लगिएको छ । वीरेन्द्रनगरलाई सुन्दर, सफा र हरियाली शहर बनाउने दीर्घकालीन सोचका साथ हरित नगरको रूपमा विकास गर्न लागिएको हो । 

जसअन्तर्गत नगरपालिकाले ‘एक घर दुई बिरुवा, हामी आफैं कुरुवा’ कार्यक्रम सञ्चालन गरिरहेको छ । 

यो कार्यक्रमअन्तर्गत वीरेन्द्रनगरभित्र नयाँ घर निर्माण गर्ने घर धनीले आफ्नो आगनमा दुई बिरुवा वृक्षारोपण गर्नुपर्ने हुन्छ भने त्यसको रेखदेख पनि आफैँ गर्नुपर्ने हुन्छ । 

नगरपालिकाको यो नीतिले वीरेन्द्रनगरलाई हरियाली, सुन्दर बनाउन सघाउ पुग्ने अपेक्षा लिइएको छ ।

नगरप्रमुख मोहनमाया ढकाल भन्छिन्, 'नयाँ घर निर्माण गर्नेले दुइवटा बिरुवा वृक्षारोपण गर्ने हाम्रो नीतिमा पनि छ, अहिले नगरपालिकामा वृक्षारोपण अभियान समेत चलाएको छ । विगतभन्दा वीरेन्द्रनगर सुन्दर र सफा बन्दै गएको छ ।' 

नगरभित्र निर्माण भएका नयाँ सडकको आसपासमा समेत वृक्षारोपण गरिएको भन्दै उनले दुई वर्षमा करिब दश हजार नयाँ बिरुवा सडक छेउछाउमा रोपिएको उनको भनाइ छ । 

सडक छेउछाउमा अहिले फलफूलका बिरुवा समेत रोपिएको भन्दै प्रमुख ढकालले एकातिर वृक्षारोपण र अर्कोतर्फ नगरपालिकाको आम्दानीमा समेत वृद्धि हुने अपेक्षा लिइएको बताइन्। नगरपालिकाले अहिले ५० प्रतिशत अनुदानमा फलफूलका बिरुवा वितरण गरिरहेको छ ।

नगरपालिकाले प्लाष्टिकमुक्त नगर बनाउने गरी योजना बनाएको र त्यसको कार्यान्वयनको लागि आम नागरिकलाई सचेतना जगाइरहेको उनको भनाइ छ । 'अहिले हाम्रो वीरेन्द्रनगर नगरपालिकामा ३५० भन्दा धेरै टोल विकास समिति छन्, ती समितिमा प्रशिक्षक पनि राखेका छौं । उहाँहरूमार्फत गाउँगाउँमा हरियाली शहर बनाउनुपर्छ भनेर अभियान र सचेतना जगाइरहेका छौँ । मलाई लाग्छ अबको पाँच वर्षभित्र वीरेन्द्रनगर नगरपालिका हरियाली, सुन्दर प्लाष्टिकमुक्त भइसक्छ ।'

नगरपालिकाले जलवायु परिवर्तनले पारेका असर न्यूनीकरण गर्न समेत विभिन्न योजना बनाएर काम गरिरहेको उनको भनाइ छ । रासस