हुथी विद्रोहीले अमेरिकी हवाई हमलामा मृत्यु हुनेको संख्या ५३ पुगेको बताएका छन्

अमेरिकी हवाई हमलामा मृत्यु हुनेको संख्या ५३ पुगेको यमनका हुथी विद्रोहीले बताएका छन् । विद्रोहीको स्वास्थ्य मन्त्रालयले जारी गरेको विज्ञप्तिमा मृत्यु हुनेमा पाँच बालबालिका पनि रहेको जनाएको छ ।

शनिबार अमेरिकाले हुथी विद्रोहीविरुद्ध ‘निर्णायक र शक्तिशाली’ हवाई हमला गरेको बताएको थियो ।

अमेरिकी राष्ट्रपति डोनाल्ड ट्रम्पले लाल सागरमा भएको जहाजमा हुथी विद्रोहीले गरेको हमलालाई हुथी विद्रोहीहरूविरुद्ध प्रत्यक्ष कारबाही गर्नुको कारण बताएका छन् ।

अमेरिकी पक्षले भने आक्रमणमा मारिनेमा केही प्रमुख हुथी विद्रोही पनि रहेको बताएको छ । यद्यपि हुथी विद्रोहीहरूले यसको पुष्टि गरेका छैनन् ।

यसैबीच, हुथी विद्रोही नेता अब्दुल मलिक अल-हुथीले यमनमा अमेरिकी आक्रमण जारी रहेसम्म हुथी विद्रोहीहरूले लाल सागरमा अमेरिकी जहाजहरूलाई निशाना बनाइरहने बताए।